އައިއެމްއެފް ރިޕޯޓާއެކު އިންވެސްޓަރުންގެ ކޮންފިޑެންސް އިތުރު ވެގެން ގޮސްފި: ރައީސް
އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ރާއްޖޭގެ އިގްތިސާދީ ހާލަތާ ގުޅޭ ގޮތުން އާއްމުކޮށްފައިވާ ރިޕޯޓާއެކު އިންވެސްޓަރުންގެ ކޮންފިޑެންސް އިތުރު ވެގެން ގޮސްފައިވާ ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
މިހާރު ތ. އަތޮޅަށް ކުރައްވަމުންގެންދަވާ ދަތުރުފުޅުގައި އެ އަތޮޅު އޮމަދޫއަށް ވަޑައިގެން ވާހަކަފުޅު ދައްކަވަމުން ރައީސް ވިދާޅުވީ އައިއެމްއެފްއިން ނެރުއްވީ ވަރަށް ރަނގަަޅު ރިޕޯޓެއް ކަމަށާއި، ރިޕޯޓުން ހާމަވީ މި ސަރުކާރުން އެކުލަވާލި އިޤްތިޞާދީ ސިޔާސަތު ބަލައިގެންފައިވާ މިންވަރު ކަމަށެވެ.
"އެއީޔޭ ކަންކަން ކުރަންވީ ގޮތަކީ, ޕީއެސްއައިޕީ މަޝްރޫއުތައް ވެސް ތަތުތީބުކޮށްލައިގެން, ދެން ހުރި ސަބްސިޓީތަކާއި ކަންކަން. ވެސް ހަމައަކަށް ފައްތައިގެން. ޚަރަދު ދެކޮޅު ޖައްްސަައިގެން, އާއްމުދަނީ އިތުރު ކުރުމަށްޓަކައި އިޤްތިޞާދު ފުޅާކުރަން އަޅުގަނޑުމެން ނިންމާފައިހުރި ކަންކަން ފަށައިގެން" ރައީސް ވިދާޅުވިއެވެ.
ރައީސް ވިދާޅުވީ އެމަގުން ކުރިޔަށްދާނަމަ އިންވެސްޓަރުން ލިބޭނެ ކަމަަށާއި އެއާއެކު ސަރުކާރުގެ އާއްމުދަނީ އިތުރުވެ, ޕްރައިވެޓް ސެކްޓަރ މުއްސަދިވެ, ރައްޔިތުން ބޭނުންވާ ކަންކަން ވެގެންދާނެ ކަމަށެވެ.
"އެމަގުން ކުރިޔަށްދާނަމަ އަޅުގަނޑުމެންނަށް އިންވެސްޓަރުން ލިބޭނެ. އައިއެމްއެފް ކަހަލަ ތަންތަނުން އަޅުގަނޑުމެންގެ ސިޔާސަތު ބަލައިގަތީމަ އެބުނެވެނީ ވަރަށް ބޮޑު އެއްޗެއް. އޭގެ މައްޗަށް ބިނާވާނެ އިންވެސްޓަރ ކޮންފިޑެންސް" އެމަނިކުފާނު ވިދާޅުވިއެވެ.
ރައީސް ވިދާޅުވީ ތަރުތީބުކޮށްގެން އެންމެ އިސްކަމެއް ދޭން ޖެހޭ ކަންކަމަށް އިސްކަންދީގެން މަސައްކަތްތައް ކުރާނެ ކަމަށާއި ބަހާލައިގެން ކުރިއަށްގެންދަން މަސައްކަތް ކުރާނަމަ އާމްދަނީއާއި ކުރާ ހަރަދު ދެކޮޅު ޖައްސަމުން ކުރިއަށްގެންދެވޭނެ ކަމަށެވެ.
އިގުތިސާދީ ހާލަތު ގޯސްކަން ފާހަގަކުރައްވައި، މާލީ އިސްލާހީ ފިޔަވަޅުތައް އެޅުމުގެ މަސައްކަތް ކުރަމުން އަންނަ ކަމަށް ރައީސ މިދިޔަ ހޯމަ ދުވަހު އިއްވެވި ރިޔާސީ ބަޔާނުގައި ވެސް ވަނީ ވިދާޅުވެފައެވެ.
އައިއެމްއެފުން މިމަހުގެ ހަ ވަނަ ދުވަހު އާންމުކުރި ރިޕޯޓުގައި ބުނެފައިވަނީ ކޮވިޑު 19ގެ ބަލިމަޑުކަމަށް ފަހު ރާއްޖޭގެ އިގުތިސާދު ހަލުވިކަމާއެކު ކުރިއަރަމުން އައިސްފައި މި ފަހުން މަޑުޖެހިފައިވާ ކަމަށެވެ. މި އަހަރު 5.2 އިންސައްތަ ކުރިއަރާނެ ކަމަށް ލަފާކުރެވޭއިރު ފަތުރުވެރިން ޒިޔާރަތްކުރާ މިންވަރު ވެސް އިތުރުވާނެކަމަށް އައިއެމްއެފުން ލަފާކުރެއެވެ.
