މި ފަހުންވެސް ދިވެހި އާއިލާއެއް ސީރިޔާއަށް ގޮސްފި: އިހުސާން
ދީނީ ހަރުކަށި ފިކުރު ގެންގުޅޭ ދިވެހި އާއިލާއެއްގެ ބަޔަކު ދާދި ފަހުން ސީރިޔާއަށް ގޮސްފައިވާ ހޯމް މިނިސްޓަރު އަލީ އިހުސާން ރޭ ވިދާޅުވެއްޖެއެވެ.
ރޭ ސަންގު ޓިވީގައި ވާހަކަ ދައްކަވަމުން މިނިސްޓަރު ވިދާޅުވީ ސީރިޔާއަށް ގޮސްފައިވަނީ ދެމަފިރިން ކަމަށެވެ. އަންހެން މީހާއާކީ މާބަނޑު މީހެއް ކަމަށް އިހުސާން ވިދާޅުވިއެވެ.
''ކިހިނެއްތޯ މާބަނޑު އަންހެނެއް ގޮވައިގެން މިފަދަ ތަނެއްގައި އުޅޭނީ. ވަގުތުން ހާލުގަިއ ޖެހުނީ'' މިނިސްޓަރު ވިދާޅުވީ އެމީހުން އަނބުރާ ރާއްޖެ ގެނައުމަށް އާއިލާއިން އެދެމުންދާ ކަމަށެވެ.
އިހުސާން ވިދާޅުވީ ސީރިޔާގައި ތިބި ދިވެހިންގެ ސީދާ ދަންނަވަން ދަތިކަމަށެވެ. ނަމަވެސް 100 އަށްވުރެ ގިނަ ބަޔަކު ނުވަތަ އާއިލާއެއް ދިރިއުޅެމުންދާ ކަމުގެ ރިޕޯޓް ލިބިވަޑައިގެންފައިވާ ކަމަށް ވިދާޅުވިއެވެ.
''އާއިލާ އެކޭ މި ދެންނެވީ ފުރައިގެން ދަނީ ދެމަފިރިން، ނުވަތަ ދެމަފިރިންނާ ދެކުދިންނާ، އެކަމަކު މި އަހަރު ނިމޭއިރުގައި އަންހެން މީހާ އެކަނި ހުންނަނީ'' މިނިސްޓަރު ވިދާޅުވިއެވެ.
އިހުސާން ވިދާޅުވި ގޮތުގައި ސީރިޔާގެ ދެ ކެމްޕޭއެގައި ދިވެހިން އެބަ ދިރިއުޅެއެވެ. އެތަންތަނުގައި އުޅެނީ ކިތައް ދިވެހިންތޯ ޔަގީންކުރެވޭނީ ޑީއެންއޭ ޓެސްޓު ހެދުމަށް ފަހު ކަމަށެވެ.
ސީރިޔާގައި ތިބި އަނބުރާ ރާއްޖެ ގެނެވޭނެ ގޮތް ނުވަތަ އެތަންތަނުގައި ބައިތިއްބައިގެން ދިވެހި ރައްޔިތެއްކަން ކަށަވަރު ކުރެވޭނެ ގޮތްތައް ފޮރިން ކުރަމުންދާ ކަމަށް ވިދާޅުވިއެވެ.
ހަރުކަށި ފިކުރުގެ ވިސްނުމުގައި ތިބެ، ސީރިޔާ ހަނގުރާމައިގައި ބައިވެރިވާން ދިޔަ ދިވެހިން، ގެންދިޔަ އާއިލާތަކުގެ ތެރެއިން 21 މީހަކު މިއަދު ހެނދުނު ވަނީ ރާއްޖެ ގެނެސްފަ އެވެ. އެއީ 15 ކުޑަކުދިންނާއި، ފަސް އަންހެނުންނާއި ފިރިހެނެކެވެ.
ސީރިޔާ ހަނގުރާމައިގައި ބައިވެރިވާން ދިޔަ ދިވެހިންގެ ތެރެއިން 21 މީހަކު ދާދި ފަހުން ވަނީ އަނބުރާ ރާއްޖެ ގެނެސްފައެވެ. އެއީ 15 ކުޑަކުދިންނާއި، ފަސް އަންހެނުންނާއި ފިރިހެނެކެވެ. އެމީހުން މިހާރު ތިބީ ހިންމަފުށީގައި ހުންނަ ރިހެބިލިޓޭޝަން ސެންޓަރުގައެވެ.
އެއިން ކޮންމެ މީހަކަށް ކުރިއަށް ގެންދަން ޖެހެނީ ކޮންކަހަލަ ރިހިބިލިޓޭޝަން ޕްރޮގްރާމް ތަކެއްތޯ ދަނެގަންނާނެ ކަމަށާއި އޭގެ ފަހުން ފަރުވާ ފަށައި ހުރިހާ އެންމެނަށް ވެސް ފަރުވާދޭނެ ކަމުގެ ފުރިހަމަ ޔަގީންކަން އޮތްކަން އިހުސާން ވަނީ މީގެ ކުރިން ވިދާޅުވެފައެވެ.
