މަޖިލީހުގެ ރައީސާއި، ނައިބް ރައީސް ވަކިކުރުމުގެ މައްސަލަ ނަގައިފި
ޕީޕީއެމް/ޕީއެންސީން 23 މެންބަރެއްގެ ސޮޔާއެކު ހުށަހެޅި ރައްޔިތުންގެ މަޖިލީހުގެ ރައީސް މުޙައްމަދު އަސްލަމާއި ނައިބު ރައީސް އަޙްމަދު ސަލީމްގެ މަޤާމުން ވަކިކުރުމުގެ މައްސަލަ ކުރިއަށް ނުގެންދަން ނިންމައިފިއެވެ.
މިކަން ހާމަކުރައްވާ ރައްޔިތުންގެ މަޖިލީހުގެ މައިނޯރިޓީ ލީޑަރު އަދި ފޮނަދޫ ދާއިރާގެ މެންބަރު މޫސާ ސިރާޖު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މި ވަގުތު އެ މައްސަލަ ކުރިއަށްގެންދަން ބޭނުން ނުވަނީ ކަމަށެވެ. އަދި އެކަން މިހާރު މަޖިލީހަށް އަންގާފައިވާނެ ކަމަށްވެސް ސިރާޖު ވިދާޅުވިއެވެ. އެކަމާއި ގުޅޭ އިތުރު ތަފްސީލެއް ސިރާޖު ނުދެއްވައެވެ.
ސިރާޖުގެ ހިމެނޭހެން 13 މެންބަރަކު ވަނީ ސޮއި އަނބުރާ ގެންގޮސްފައެވެ. އެހެން ކަމުން މައްސަލަ ކުރިއަށް ގެންދިއުމަށް ބޭނުންވާ ގާނޫނީ އަދަދު ވަނީ ގެއްލިފައެވެ.
ސޮއި އަނބުރާ ގެންދެވި 13 މެންބަރުން:
- އޭދަފުށީ ދާއިރާގެ މެމްބަރު އަހުމަދު ސަލީމް
- ފޮނަދޫ ދާއިރާގެ މެމްބަރު މޫސާ ސިރާޖު
- ނޮޅިވަރަމް ދާއިރާގެ މެމްބަރު މުހައްމަދު ނަޝީދު
- ތުލުސްދޫ ދާއިރާގެ މެމްބަރު އިބްރާހިމް ނަސީމް
- ފޭދޫ ދާއިރާގެ މެމްބަރު މުހައްމަދު ނިހާދު
- އިސްދޫ ދާއިރާގެ މެމްބަރު އަލީ ހަމީދު
- ނިލަންދޫ ދާއިރާގެ މެމްބަރު އަބްދުލްމުހުސިން ހަމީދު
- މުލަކު ދާއިރާގެ މެމްބަރު އިބްރާހިމް ނަސީރު
- މަތިވެރި ދާއިރާގެ މެމްބަރު ހަސަން ޒަރީރު
- ތޮއްޑޫ ދާއިރާގެ މެމްބަރު ހަސަން ޝިޔާން
- ގުރައިދޫ ދާއިރާގެ މެމްބަރު އިބްރާހިމް ޝާޒް
- ކުރެންދޫ ދާއިރާގެ މެމްބަރު އަބްދުލްޣަނީ އަބްދުލްހަކީމް
- ކޮމަންޑޫ ދާއިރާގެ މެމްބަރު މުހައްމަދު ރާޝިދު
މައްސަލަ ކުރިއަށް ގެންދަން ބޭނުންވާ ޤާނޫނީ އަދަދު ގެއްލިފައި ވާތީ އެ މައްސަލައިގެ ނޯޓިސް ފޮނުވާފައި އޮތަސް އެ މައްސަލަ ދެން ކުރިއަކަށް ނުގެންދާނެ އެވެ.
ޕީޕީއެމް/ޕީއެންސީން މި މައްސަލަ މަޖިލީހަށް ހުށަހެޅީ މިދިޔަ ޖެނުއަރީ މަހުގެ 28 ވަނަ ދުވަހުއެވެ. މި މައްސަލަ ހުށަހަޅާފައި ވަނީ ޕީޕީއެމް/ޕީއެންސީގެ އިތުރުން އެމްޑީއޭ އަދި އަމިއްލަ ބައެއް މެންބަރުންގެވެސް ސޮޔާއެކުގައެވެ. މީގެ އިތުރުން މި މައްސަލައިގެ ނޯޓިސްވެސް މަޖިލީހުގެ އިދާރާއިން ވަނީ އެ ދެބޭފުޅުންނަށް ފޮނުވާފައެވެ.
