އަމާޒަކީ ކައުންސިލްތަކަށް ޤާނޫނީ ވާޖިބު އަދާކޮށް، ގުޅިގެން މަސައްކަތް ކުރެވޭނެ މާޙައުލެއް އުފައްދައިދިނުން: ރައީސް
އަމާޒަކީ ކައުންސިލްތަކަށް ޤާނޫނީ ވާޖިބު އަދާކޮށް، ގުޅިގެން މަސައްކަތް ކުރެވޭނެ މާޙައުލެއް އުފައްދައިދިނުން ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ދިވެހިރާއްޖޭގެ ލާމަރުކަޒީ ދުވަހުގެ މުނާސަބަތުގައި، ދެއްވި ޚިޠާބުގައެވެ.
ރައީސް ވިދާޅުވީ ދިވެހިރާއްޖޭގެ އިދާރީ ދާއިރާތައް، ފުރިހަމަ ލާމަރުކަޒީ ނިޒާމެއްގެ ތެރެއިން ހިންގާކަން ކަށަވަރުކޮށް، ލާމަރުކަޒީ ނިޒާމު އިތުރަށް ހަރުދަނާކޮށް، ކައުންސިލްތަކަށް ޤާނޫނުން ލިބިދީފައިވާ ބާރާއި އިޚްތިޔާރު، އޭގެ އެންމެ ފުރިހަމަ މާނައިގައި ތަންފީޒުވާކަން ކަށަވަރު ކުރުމަކީ، ސަރުކާރުގެ މުހިންމު ސިޔާސަތެއް ކަމަށެވެ.
އަދި ލޯކަލް ކައުންސިލްތަކަކީ، ދައުލަތުގެ ފަރާތުން ރައްޔިތުންނަށް ޚިދުމަތް ފޯރުކޮށްދޭ ސަރުކާރުގެ މުހިންމު އެއް ފަށަލަ ކަމަށާއި އެއޫ ސަރުކާރުގެ ސިޔާސަތުތައް، ސިޓީ، އަތޮޅު އަދި ރަށުފެންވަރުގައި ތަންފީޒުކޮށް، ރައްޔިތުންނަށް ދުވަހުން ދުވަހަށް ބޭނުންވާ ޚިދުމަތްތައް ވިލަރެސްކޮށް ބަލަހައްޓާ އިދާރާ ކަމަށެވެ.
އެހެންކަމުން، ލޯކަލް ކައުންސިލްތަކުގެ އެންމެ މުހިންމު އެއް ދައުރަކީ، ރައްޔިތުންނަށް ދެވޭ ޚިދުމަތްތައް، ސަރުކާރުގެ އިދާރާތަކާ ގުޅިގެން، ހަމަހަމަކަމާއެކު ރައްޔިތުން އެދޭގޮތަށް ބައްޓަންކުރުމަށް މަސައްކަތް ކުރުން ކަމަށާއި މިގޮތަށް ކައުންސިލްތަކުގެ ހިންގުން ބައްޓަން ކުރެވޭނީ، ރައްޔިތުންގެ ޚިޔާލާއި ބައިވެރިވުން އިތުރުކޮށްގެން ކަމަށް ރައީސް ވިދާޅުވިއެވެ.
“މި މަގަށް ކަންކަން ފަހިކުރުމަށްޓަކައި ޚާއްޞަކޮށް، ކައުންސިލްތަކުން ރައްޔިތުންނަށް ދޭ ޚިދުމަތް ރަނގަޅުކޮށް، ކައުންސިލްތައް ބާރުވެރިކުރުމަށްޓަކައި ވުޒާރާތަކާއި ހުރިހާ މުއައްސަސާތަކުން ވެސް ކައުންސިލްތަކަށް ބޭނުންވާ މަޢުލޫމާތު ފޯރުކޮށްދީ، ޚާއްޞަ ގޮތެއްގައި، ރައްޔިތުންނާ ގުޅޭ ކަންކަން ރާވައި ހިންގުމުގައި، ކައުންސިލްތަކާއި ރައްޔިތުންގެ ބައިވެރިވުން އިތުރުކުރަންޖެހޭ” ރައީސް ވިދާޅުވިއެވެ.
ލާމަރުކަޒީ ނިޒާމު ހިންގުމުގައި، ރައްޔިތުންނާއި ކައުންސިލްތަކާއި ސަރުކާރާ ގުޅުވައިދީ، އަދި ކައުންސިލްތަކާއި ލޯކަލް ގަވަރންމަންޓް އޮތޯރިޓީއަށް ސަރުކާރުގެ ތެރެއިން ބޭނުންވާ އެހީތެރިކަމާއި އެއްބާރުލުން ލިބިދީ، ލާމަރުކަޒީ ނިޒާމު އިތުރަށް ހަރުދަނާކުރުމަށް، ވަކި މިނިސްޓްރީއެއް އުފައްދާފައިވާ ކަން ފާހަގަކޮށް ރައީސް ވިދާޅުވީ އެ މިނިސްޓްރީ އުފެއްދުމުގެ ނަތީޖާ ފެންނަމުންދާ ކަމަށެވެ.
އެގޮތުން ސަރުކާރުގެ ތެރެއިން ކައުންސިލްތަކަށް ބޭނުންވާ އެހީތެރިކަން ފޯރުކޮށްދެމުންދާ ކަމަށާއި ސަރުކާރުގެ އޮފީސްތަކުން ކައުންސިލްތަކަށް ބޭނުންވާ އެހީތެރިކަމާއި އެއްބާރުލުން އިތުރުވެ، ކަންކަމުގައި އީޖާބީ ގޮތެއްގައި ސަރުކާރާއި ކައުންސިލްތަކާއެކު ކުރެވޭ މަސައްކަތް އިތުރުވެ، ހިންގުމުގެ ސްޕީޑް ވެސް ހަލުއިވަމުންދާ ކަމަށް ރައީސް ވިދާޅުވިއެވެ.
