ކައުންސިލްތަކުގެ އިދާރީ މުވައްޒަފުންގެ މުސާރައަށް ކުރިއެރުންތައް ލިބޭނެ މަގު ފަހިކޮށްދޭނަން: ރައީސް
ކައުންސިލްތަކުގެ އިދާރީ މުވައްޒަފުންނަށް މުސާރައިގެ ކުރިއެރުންތައް ފަސޭހައިން ލިބޭނެ މަގު ފަހި ކޮށްދިނުމަށް މަސައްކަތްކޮށް ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.
އެހެން އިދާރާތަކުގައި ސިވިލް ސާވިސް މުވައްޒަފުން ކިޔެވުމުން މުސާރަ އާއި އިނާޔަތްތައް އިތުރުވިޔަސް އެ ފުރުސަތު ކައުންސިލުގައި ފަހިކޮށްދީފައިނުވާ ކަމަށާއި މި ސަރުކާރުން އެ ކަމުގައި މަސައްކަތް ކޮށްދެއްްވާނެތޯ ނ. މަނަދޫ ކައުންސިލް މުވައްޒަފެއް ކަމަށްވާ އެ ރަށު، ހޭޅި، ޢައްޒާ ޢަބްދުލްޣަފޫރު ދެންނެވި ސުވާލަށް ޖަވާބު ދެއްވަމުން ރައީސް މުޢިއްޒު ވިދާޅުވީ މައިގަނޑު މައްސަލައަކީ ރައްޔިތުންގެ މަޖިލީހުން ކެޓަގަރީކޮށްފައިވާ ގޮތުން ކައުންސިލްތައް ހިމެނެނީ އެންމެ ދަށް ފަންތީގައި ކަމަށެވެ.
އެގޮތުން ކުރިއަށް އޮތް ތަނުގައި ޕޭ ސްޓްރަކްޗާ ހެދުމުގެ ކަންތައް ހެދުމުގެ ތެރޭގައި އެ ކަމަށް ހައްލެއް ގެނެސްދެއްވާނެ ކަމަށް ރައީސް ވިދާޅުވިއެވެ.
ކައުންސިލްތަކުގެ މުވައްޒަފުންގެ ބުރަ މަސައްކަތް ވަރަށް ގާތުން ފެނިފައިވާ ކަމަށާއި އެހެން އޮފީސްތަކާއި ޚިލާފަށް ކައުންސިލްގެ ސިވިލް މުވައްޒަފުންނަކީ ރެއާ ދުވާލު ޚިދުމަތްދޭން ޖެހޭ ބައެއް ކަމަށް ރައީސް ވިދާޅުވެފައި ވެއެވެ.
އަދި އެކަމުގައި ކުރިމަތިވަނީ ގާނޫނީ މައްސަލަތަކެއް ކަމަށާއި މަޖިލީހުގެ ތެރެއިން ގާނޫނީ ބަދަލުތައް ގެންނަން ޖެހޭ ކަމަށް ރައީސް ވިދާޅުވިއެވެ.
މީގެ އިތުުން މިއީ އެ މަނިކުފާނު، މާލޭގެ މޭޔަރު ކަމުގައި ހުންނެވިއިރު ވެސް ހައްލު ކުރައްވަން މަސައްކަތް ކުރެއްވި ކަމެއް ކަމަށެވެ.
އެހެން ކަމުން ރައްޔިތުންގެ މަޖިލީހުގެ ތެރެއިން ގާނޫނުތަކާއި ގަވާއިދުތަކަށް ގެންނަން ޖެހޭ އިސްލާހުތަކާ އެކީގައި ކައުންސިލުގެ ސިވިލް ސާވިސް ސްޓާފުންނަށް ވަޒީފާގައި އުޅޭއިރު ކިޔެވުމަށް ބޭސްޑްކޮށް ދެން ބަލަންޖެހޭ މިންގަނޑުތަކުގެ ކުރިއެރުންތައް ފަސޭހައިން ލިބޭނެ މަގު ފަހިކުރުމަށް މަސައްކަތް ކޮށްދެއްްވާނެ ކަމަށް ރައީސް ވިދާޅުވިއެވެ.
