24 ގަޑިއިރު މުޅި ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ނިޒާމު މި މަހު ގާއިމްކުރާނީ
ރާއްޖޭގެ ކަނޑުގެ ސަރަހައްދު 24 ގަޑިއިރު ބެލެހެއްޓޭނެ ނިޒާމެއް ވަރަށް އަވަހަށް ގާއިމުވެގެން ދާނެ ކަމަށް ރައީސް ޑރ. މުޙައްމަދު މުއިއްޒު ރޭ ވިދާޅުވެއްޖެއެވެ.
މިހާރު ރ. އަތޮޅާއި ބ. އަތޮޅުގެ ރަށްތަކައް ކުރައްވަމުންގެންދަވާ ދަތުުރުފުޅުގައި މީދޫއަށް ވަޑައިގެން އެރަށު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސް ވިދާޅުވީ ރާއްޖޭގެ އިގްތިސާދީ ސަރަހައްދު މިއަދާ ހަމައަށްވެސް ރަނގަޅަށް ބެލެހެއްޓިފައި ނެތް ކަމަށާއި މާޗް މަހުގެ ތެރޭގައި އެ މަސައްކަތް ފެށޭނެ ކަމަށެވެ.
"އިރާދަކުރެއްވިއްޔާ މި މާޗު މަހުގެ ތެރޭގައި އަޅުގަނޑުމެންނަށް އެ މަސައްކަތް ފެށޭނެ. ހުއްޓުމެއްނެތި 24 ގަޑިއިރު ހުއްޓުމެއްނެތި މި ސަރަހަައްދު ބެލެހެއްޓޭނެ،" ރައީސް ވިދާޅުވިއެވެ.
ރައީސް ވިދާޅުވީ އިގްތިޞާދު ފުޅާކުރުމަށް އޮތް ބޮޑު ސަރަހައްދަކީ ރާއްޖޭގެ 99 އިންސައްތަ ކަމަށްވާ ކަނޑުގެ ސަރަހައްދު ކަމަށާއި އެ ބޮޑު ސަރަހައްދަށް މިއަދާ ހަމައަށްވެސް ރާއްޖޭގެ އެއްވެސް ބާރެއް ނެތްކަމަށެވެ.
ޒަމާނުއްސުރެ އެ ސަރަހައްދު ބެލެހެއްޓުމުގެ އަމިއްލަ ކެޕޭސިޓީއެއް ނެތް ކަން ފާހަގަކުރައްވަމުން ރައީސް ވިދާޅުވީ މިހާރުވެސް ބެލެހެއްޓެނީ ރާއްޖޭގެ ސަރަހައްދުގެ ދެ ތިން ޕަސެންޓެއްކަމަށާއި އެއީވެސް ރާއްޖޭގެ އެތެރެވަރީގައި އޮތް ސަރަހައްދުކަަމަށެވެ.
މި މާޗް މަހުގެ ތެރޭގައި ހުއްޓުމެއް ނެތި 24 ގަޑިއިރު ރާއްޖޭގެ ކަނޑުގެ ސަރަހައްދު ބަލަހައްޓަން ފެށުމުން އަމިއްލަ ވަންތަކަމުގެ އިހްސާސްވެެގެން ދާނެކަމަށާއި އޭރުން މިނިވަންކަން އެހެން ބައެއްގެ ބާރުވެރިކަމަށް ނުގޮސް ރައްކާތެރިކުރެވޭނެކަމަށް ރައީސް ވިދާޅުވިއެވެ. އެމަނިކުފާނަށް ރައްޔިތުން ހަވާލުކުރި އެންމެ ބޮޑު އެއް ޒިންމާއަކީވެސް ރާއްޖޭގެ މިނިވަންކަން ރައްކާތެރިކުރުން ކަމަށް ރައީސް ފާހަގަކުރެއްވިއެވެެ.
