ރައީސް، 100 ކައުންސިލާ ބައްދަލުކުރައްވައިފި
މިދިޔަ ަހަރުގެ ނޮވެމްބަރު މަހު ވެރިކަމާއި ހަވާލުވެ ވަޑައިގެންނެވި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ރާއްޖޭގެ 100 ކައުންސިލާއި ބައްދަލު ކުރައްވައިފިއެވެ.
އެގޮތުން 100 ވަނަ ކައުންސިލްގެ ގޮތުގައި އެ މަނިކުފާނު ބައްދަލު ކުރައްވާފައި ވަނީ މިހާރު ރ. އަތޮޅަށް ކުރައްވަމުންދާ ދަތުރުފުޅުގެ ތެރެއިން ރ. ރަސްގެތީމު ކައުންސިލާއެވެ. މި ބައްދަލުކުރެއްވުން އޮތީ ރ. އަތޮޅު ވެރިކަން ކުރާ ރަށް ރ. އުނގޫފާރުގައެވެ.
ރަސްގެތީމު ކައުންސިލްގެ ރައީސް މުޙައްމަދު ފަތީން ވިދާޅުވީ މީގެކުރީގައި ކައުންސިލްތަކުން ރައީސްއާއި ބައްދަލުކުރެއްވުމުގެ ފުރުސަތު ގިނަފަހަރަށް ލިބެނީ، އެޕޮއިންޓްމަންޓް ހައްދައިގެން ވެރިރަށް މާލެއަށް ގޮސްގެން ކަމަށެވެ.
ރަށްތަކަށް ވަޑައިގެން ރައީސުލްޖުމްހޫރިއްޔާ އިސްނަންގަވައި ކައުންސިލްތަކަށް ދަޢުވަތު ދެއްވައިގެން، އެ އަތޮޅެއްގައި ރަށުގައި ނުވަތަ ރަށް ހިމެނޭ ސަރަޙައްދުން ބައްދަލު ކުރެއްވުމުގެ ފުރުޞަތު ލިބުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށާއި މިއީ ލާމަރުކަޒީ މަސައްކަތުގެ ވަަރަށް ރީތި ނަމޫނާއެއް ކަމަށް ފަތީން ވިދާޅުވެފައި ވެއެވެ.
މީގެ އިތުރުން ފަތީން ވާހަކަފުޅުގައި ވަނީ 100ވަނަ ކައުންސިލްގެ ގޮތުގައި ރަސްގެތީމު ހިމެނުމަކީ ލިބޭ ޝަރަފެއް ކަން ފާހަގަކުރައްވާފައެވެ.
ވެރިކަމަށް ވަަދައިގެ ތިން މަސް ދުވަސްތެރޭގައި ރައީސް އަތޮޅުތަކަށް ވަޑައިގެން ކައުންސިލްތަކާއި ބައްދަލުކުރެއްވުމަކީ ލިބޭ ވަރަށް ބޮޑު އުފަލެއްގެ ގޮތުގައި ހުރިހާ ކައުންސިލްތަކުން އަންނަނީ ފާހަގަކުރަމުންނެވެ.
ކައުންސިލްތަކުން ފާހަގަކުރާގޮތުގައި މި ބައްދަލު ކުރެއްވުންތަކުގެ ސަބަބުން ރަށުގެ ތަރައްޤީއަށް ބޭނުންވާ ކަންކަމާއި ރައްޔިތުންގެ އެދުންތައް ސީދާ ރައީސްއާ ހިއްސާކުރެއްވުމުގެ ފުރުސަތު ލިބިގެންދާ ކަމަށެވެ.
ކުރިއަށް މިއޮތް ދެތިން ހަފްތާތެރޭގައި ރާއްޖޭގެ ހުރިހަ އަތޮޅަކަށް ވަޑައިގަތުމަކީ ރައީސްގެ ވަރަށް ބޮޑު އަމާޒެކެވެ.
Ads by STO
