މަޖިލީހުގެ ޖަލްސާއެއް މާދަމާއަށް ތާވަލުކޮށްފި
ރައްޔިތުންގެ މަޖިލީހުގެ މިއަދުގެ ޖަލްސާ ނުބާއްވާ މާދަމާ ޖަލްސާއެއް ބޭއްވުމަށް ތާވަލުކޮށްފިއެވެ.
އެ ޖަލްސާގެ އެޖެންޑާ އަދި އާންމުކޮށްފައިނުވި ނަމަވެސް މާދަމާއަށް ޖަލްސާއެއް ތާވަލުކޮށްފައިވާކަން މަޖިލީހުގެ ޑިރެކްޓާ އޮފް ކޮމިއުނިކޭޝަން ހަސަން ޒިޔާއު ވަނީ ކަށަވަރުކޮށް ދެއްވާފައެވެ.
މަޖިލީހުގެ ޖަލްސާއެއް މާދަމާއަށް އެޖެންޑާކޮށްފައި މިވަނީ، ގާނޫނުގައިވާ ގޮތަށް މަޖިލީހުގެ ޖަލްސާއަށް ހަފްތާއަކު ތިން ދުވަހު ނުބޭއްވޭތީ، މަޖިލީހުގައި ނުނިމިހުރި މަސައްކަތްތައް ފުނިޖެހި، ދައުލަތުގެ ކުރިއެރުމަށް ހުރަސްއެޅިފައިވާ ކަމަށް ވިދާޅުވެ ޑިމޮކްރެޓްސް އަށް ނިސްބަތްވާ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ގަރާރެއް ހުށަހަޅާފައި ވަނިކޮށެވެ.
މި ދުވަސްވަރަކީ ކުރިއަށް އޮތް ރައްޔިތުންގެ މަޖިލިސް އިންތިހާބުގެ ކެމްޕޭން ދުވަސްވަރަށްވާތީ ގިނަ މެމްބަރުން ދަނީ ކެންޕެއިނުގައި ހަރަކާތްތެރިވަމުންނެވެ. މިކަމާއި ގުޅިގެން މަޖިލީހުގައި ކުރަންޖެހޭ މަސައްކަތްތައް ފުނި ޖެހި ކަންކަން ނުނިމި ލަސްވާތީ ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
