މި ސަރުކާރުގަ ކޯޓުތައް ހިނގާނީ މިނިވަންކަމާ އެކު: ރައީސް
މި ސަރުކާރުގަ ކޯޓުތައް ހިނގާނީ މިނިވަންކަމާ އެކު ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރ. އަދި ބ. އަތޮޅަށް ކުރައްވަމުންގެންދަވާ ރަސްމީ ދަތުރުފުޅުތަކުގެ ތެރެއިން، ތުލާދޫއަށް ވަޑައިގެން ރޭ ބޭއްވި ޖަލްސާގައި ވާހަކަދައްކަވަމުން ރައީސް ވިދާޅުވީ، އެ ރަށުގެ މުސްތަގްބަލަށްޓަކައި ބިން ހިއްކުމުގެ މަޝްރޫޢެއް ހިންގާނެ ކަމަށާއި ގެދޮރުވެރިކަމަކީ އެންމެ އިސްކަންދީގެން ކުރާނެ ކަންތައް ކަމަށެެވެ.
މިހާރު ނިމިފަ ހުރި ފްލެޓްތަކުގެ މައްސަލައެއް ކޯޓުގައި ހިނގާ ކަމުގެ މަޢުލޫމާތު ލިބިފައިވާ ކަން ފާހަގަކުރައްވަމުން ރައީސް ވިދާޅުވީ މި ސަރުކާރުގައި ކޯޓުތައް ހިނގާނީ މިނިވަންކަމާއެކު ކަމަށެވެ.
"މިހާރު ނިމިފަ ހުރި ފްލެޓްތަކުގެ މައްސަލައެއް ކޯޓުގައި ހިނގާ ކަމުގެ މަޢުލޫމާތު ލިބިފަ ވަނީ, ކޯޓުތަކަކީ މިނިވަންކަމާއެކީ ހިނގާނެ ތަނެއް އަޅުގަނޑުމެންގެ ސަރުކާރުގަ. އުންމީދުކުރަނީ އެކަން ނިމޭނެ ކަމަށް ވަރަށް އަވަހަށް" ރައީސް ވިދާޅުވިއެވެ.
ރައީސް ވިދާޅުވީ މިއަހަރުގެ ތެރޭގައި އިތުރު 100 ހައުސިން ޔުނިޓުގެ މަސައްކަތް ފަށާނެ ކަމަށާއި މިހާރު ބަޖެޓުގައި އެކަމަށް އަދަދެއް ހިމަނާފައިވާ ކަމަށެވެ. އެ މަޝްރޫޢު ކުރިޔަށް ގެންދެވޭނެ މަގު އެބައޮތް ކަމަށާއި ސިއްހީ ދާއިރާ ތަރައްގީ ކުރުމަށް ހޮސްޕިޓަލުގެ މަޝްރޫއުވެސް ފަށާނެ ކަމަށް ރައީސް ވިދާޅުވިއެވެ.
