ރީ ރަޖިސްޓްރޭޝަނަށް ހުޅުވާލައިފި، މި މަހުގެ 16 ގެ ނިޔަލަށް
އަންނަ އޭޕްރީލް މަހުގެ 21 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި ރީ ރަޖިސްޓްރީވާން އިލެކްޝަން ކޮމިޝަން (އީސީ) އިން މިއަދު ހުޅުވާލައިފިއެވެ.
ރީ ރަޖިސްޓްރީވުމުގެ ފުރުސަތު ހެނދުނު ނުވައެއް ޖެހިއިރު ހުޅުވާލާފައިވާއިރު ރީ ރަޖިސްޓްރޭޝަނަށް ލިބޭ އެއް ހަފްތާގެ މުއްދަތު ހަމަވާނީ މި މަހުގެ 16 ވަނަ ދުވަހުއެވެ.
އޮންލައިންކޮށްވެސް ރީ ރަޖިސްޓްރީ ކުރެވޭނެއެވެ. އީސީގެ ރައީސް ފުއާދު ތައުފީގް ''ދެން'' އަށް މިއަދު ވިދާޅުވީ، ބޭނުންވާ އަަދަދަކަށް ރީ ރަޖިސްޓްރީ ކޮށްފައިނުވާތީ މީގެ ކުރިން ވޯޓުފޮށިތައް ނުބެހެއްޓުނު ތަންތަނުގައި ވޯޓު ފޮށިތައް ބެހެއްޓުމުގެ ފުރުސަތު އެބައޮތް ކަމަށެވެ. ރީ ރަޖިސްޓްރީކުރަން ޖެހޭނީ މީގެ ކުރިން ވޯޓުލާން ރަޖިސްޓްރީ ކުރި ތަން ނޫން އެހެން ތަނެއްގައި ވޯޓުލާނަމައެވެ.
ކުރިން މި މަހުގެ 17 ވަނަ ދުވަހު ބާއްވަން ކަނޑައެޅި މަޖިލީސް އިންތިހާބުގައި، ރީ ރަޖިސްޓްރީކުރި މީހުންގެ އަދަދާއި އެކު ސިޓީތަކާއި އަތޮޅުތަކުގެ އިތުރުން ބޭރު ގައުމުތައް ހިމެނޭ ގޮތަށް 593 ވޯޓު ފޮށި ބަހައްޓަން އީސީން ނިންމިއެވެ.
ރަޖިސްޓްރީ ކުރުމުގެ މުއްދަތު ހަމަވިއިރު، ވޯޓުފޮށި ބެހެއްޓޭ ވަރަށް ބޭރު ގައުމުތަކުގެ ތެރެއިން ރީ ރަޖިސްޓަރީ ކޮށްފައި ވަނީ ހަމައެކަނި މެލޭޝިޔާ އާއި ސްރީލަންކާއިންނެވެ. ކުރިން ވޯޓުފޮށި ބަހައްޓަން ނިންމާފައިވާ 17 ރިސޯޓެއްގައި ވެސް ފޮށި ނުބަހައްޓަން އީސީން އޮތީ ނިންމާފައެވެ.
އީސީން ކަނޑައަޅާފައިވާ ގޮތުން ވޯޓުފޮށި ބަހައްޓާނީ 150 އަށްވުރެ ގިނަ މީހުން ރީ ރަޖިސްޓްރިވާ ގައުމުތަކުގައި އެކަންޏެވެ. އަދި ރިސޯޓުތަކުގައި ވޯޓު ފޮށި ބަހައްޓާނީ 30 އަށްވުރެ ގިނަ އަދަދަކަށް ރީ ރަޖިސްޓްރީވާ ރިސޯޓުތަކުގައި އެކަންޏެވެ.
އީސީން ބުނެފައިވާ ގޮތުން އިންތިހާބު ފަސްކުރުމުން އެ ތާރީހަށް 18 އަހަރު ފުރޭ މީހުން ހިމެނުމުން ކުރިން ލިސްޓުގައި ނެތް 560 މީހަކަށް ވޯޓު ލިބުމުގެ ހައްގު ލިބެއެވެ.
އިންތިހާބުގައި ޖުމްލަ 368 ކެންޑިޑޭޓުން ވާދަކުރާއިރު އޭގެ ތެރޭ ހިމެނެނީ 326 ފިރިހެން ކެންޑިޑޭޓުން 42 އަންހެން ކެންޑިޑޭޓުންނެވެ. ވިހި ވަނަ މަޖިލީހަށް 93 ދާއިރާއަކުން މެންބަރުން އިންތިހާބު ކުރާނެއެވެ.
އަމިއްލަ ގޮތުން 130 ކެންޑިޑޭޓުން ވާދަކުރާއިރު ހަތް ސިޔާސީ ޕާޓީއަކުން 22 އަންހެނުންނާއި 216 ފިރިހެނުންނާއެކު، ޖުމުލަ 238 ކެންޑިޑޭޓުން ވާދަކުރާ ކަމަށް އީސީން މައުލޫމާތުދެއެވެ.
