މިއީ ވަރަށް ބޮޑު ގައުމެއް, ކުޑަ ގައުމެއް ކަމަށް ގަބޫލުކުރުމަކީ ގޯހެއް: ރައީސް
މިއީ ވަރަށް ބޮޑު ގައުމެއް ކަމަށާއި ކުޑަ ގައުމެއް ކަމަށް ގަބޫލުކުރުމަކީ ގޯހެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ރާއްޖޭގެ ދިފާއީ ބާރުގެ ވައިގެ ކޯ އާއި އަސްކަރީ ޑްރޯންތައް އިފްތިތާހްކުރުމަށް މާފަރުގައި މިހާރު ކުރިޔަށްދާ ޖަލްސާގައި ވާހަކަފުޅު ދައްކަވަމުންނެވެ.
ރައީސްގެ ވާހަކަފުޅުގައި ވިދާޅުވީ ރާއްޖެއަކީ ކުޑަ ގައުމެއް ކަމަށް އެކި ބޭފުޅުން ވިސްނަމުން އައި ވިސްނުން މިރޭ ނިމުމަކަށް އައިސްފައިވާ ކަމަށާއި ރާއްޖެއަކީ މިހާރު ބޮޑު ގައުމެއް ކަމަށެވެ.
އެގޮތުން ރާއްޖޭގެ ކަނޑުގެ ސަރަހައްދު ބެލެހެއްޓުގެ ގާބިލުކަން އަމިއްލަ ދިފާއީ ބާރަށް ލިބިގެން ދިޔުމަކީ ދިިވެހިންގެ މިނިވަންކަން ޔަގީންކުރެވިގެންދާނެ ކަމެއް ކަމަށާއި ކަނޑުގެ ސަރަހައްދު ބެލެހެއްޓުމާއި ސާޗް އެންޑް ރެސްކިއު އޮޕަރޭޝަންތަކަށް އެހެން ބައެއްގެ އެހީތެރިކަމަށް ދިވެހިން ބަރޯސާވުން ނިމުމަކަށް އައުން ކަމަށެވެ.
"މި ގައުމަކީ ވަރަށް ކުޑަ ގައުމެއްގެ ގޮތުގަ އަޅުގަނޑުމެން އަމިއްލައަށް ގަބޫލުކުރަމުން އައި އައުމަކީ ރަނގަޅު ގޮތެއް ނޫންކަން އަޅުގަނޑުމެން އެބަޖެހޭ ގަބޫލުކުރަން. މިއީ ވަރށް ބޮޑު ގައުމެއް" ރައީސް ވިދާޅުވިއެވެ.
ރައީސް ވިދާޅުވީ މި ބޮޑު ސަރަހައްދު އަމިއްލަ ބާރުވެރިކަމެއް ނެތިގެން ނުބެލެހެއްޓި އޮތް އޮތުމަކީ އެކަމަށްޓަކާ ކަންބޮޑުވާންޖެހޭ ކަމެއް ނޫން ކަމަށެވެ.
"އަޅުގަނޑުމެން އެންމެންގެ ބުރަ މަސައްކަތުން މި ބޮޑު ސަރަހައްދު ބެލެހެއްޓުމުގެ ގާބިލުކަން އެކަލާންގެ ނިޢުމަތް ކުރައްވައިފި" ރައީސް ވިދާޅުވިއެވެ.
މި ސަަރަހައްދަކީ ދަރިންނާއި ދަރިންގެ ދަރީންގެ މިހާރާއި މުސްތަގްބަލް އުޖާލާކުރުމަށްޓަކާ ބޮޑު ނިޢުމަތެއް ކަން ފާހަގަކުރައްވަމުން ރައީސް ވިދާޅުވީ މި ސަރަހައްދުން އިގްތިސާދު ފުޅާކުރުމަށްޓަކައި އެތައް ކަމެއް އެބަހުރިކަން އެންމެން ގަބޫލުކުރަން ޖެހޭ ކަމަށެވެ.
