އިންޑިއާ އައުޓްގެ ވާހަކަ ދައްކަންމި ސަރުކާރުން ބިރުގަނޭ: ޔާމީން
އިންޑިއާ ސިފައިން ބޭރުކުރާނެ ކަމުގެ ވައުދާ އެކު ވެރިކަމަށް ވަޑައިގެންނެވިޔަސް، "އިންޑިއާ އައުޓު"ގެ ވާހަކަ ދައްކަން މި ސަރުކާރުން ލަދުވެތިވެ، ބިރު ގަންނަ ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެއެވެ.
ޔާމީން އުފައްދަވާ ސިޔާސީ ޕާޓީ، ޕީއެންއެފްގެ އޮފީހުގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ދިވެހި ސަރުކާރުންނާއި ސަރުކާރު ތަމްސީލްކުރަން ތިބި މަތީ ފެންވަރުގެ މީހުން އިންޑިއާ މީހުންނަށް ހަނގާ ކުރުމަށްޓަކައި ބައެއް ކަންތައްތައް ކޮށްފައިވާ ކަމަށެވެ. އެ މައްސަލައަށް ހައްލެއް ލިބިފައިނުވަނީ ކީއްވެގެންތޯ ޔާމީން ވަނީ ސުވާލުއުފައްދާފައެވެ.
އެ މައްސަލާގައި ރާއްޖެއިން ރަސްމީކޮށް މާފަށް އެދުމަށް ނުވަތަ އެ ދެ ޑެޕިއުޓީ މިނިސްޓަރުން މަގާމުން ވަކިކުރަން އިންޑިއާއިން އެދުމުންވެސް ސަރުކާރުން އެކަން ކޮށްފައިނުވާ ކަމަށް ޔާމީން ވިދާޅުވިއެވެ.
''އެ ދެ މުވައްޒަފުން ވަގުތީ ގޮތުން ސަސްޕެންޑްކުރި އެކަމަކު އެ ދެ މުވައްޒަފުން މިހާރު އެ ތިބީ އަނެއްކާވެސް ޑެޕިއުޓީ މިނިސްޓަރުންގެ ލެވެލްގައި'' ޔާމީން ވިދާޅުވިއެވެ.
ޔާމީން ވިދާޅުވީ ރައީސް ޑރ. މުޙައްމަދު މުޢިއްޒުގެ ކެންޑިޑޭޓުން ބުނަމުން ދަނީ އިންޑިއާ ސިފައިން ރާއްޖޭގައި ނެތްކަން ކަމަށާއި އިންޑިއާ ސިފައިން ރާއްޖޭގައި ތިބި އަދަދާއި ތިބި ކަން ވެސް މި ސަރުކާރުން ގަބޫލުކުރަން ބޭނުންނުވާ ކަމަށެވެ. ޔާމީން ވިދާޅުވި ގޮތުގައި އިންޑިއާ ސިފައިންގެ ވާހަަކަ ދައްކަން ވެސް ސަރުކާރުން ބިރުގަނެއެވެ.
"އިންޑިއާ އައުޓު ޖަހައިގެން، އިންޑިއާ ސިފައިން މިތާ ތިބެން ނުޖެހޭ ކަމަށް ގިނަ ދިވެހި ރައްޔިތުން ގަބޫލުކުރާތީ ވަރަށް ގިނަ މަސައްކަތްތަކެއް ކުރެވުނު އޭރު ޕީޕީއެމް ފަރާތުން އަދި ޕީއެންސީގެ ބޭބޭފުޅުން ވެސް ހިމެނޭ ގޮތަށް. މިއަދު އެ ބޭފުޅުން ލަދުވެތިވޭ، ބިރުގަނޭ އެ ވާހަކަ ދައްކަން. މިއަދު އެއީ މައްސަލައެއް ނޫން ކަމަށް ވަނީ" ޔާމީން ވިދާޅުވިއެވެ.
ރައީސް އިބްރާހިމް މުހައްމަދު ސޯލިހު ނެރުއްވި ރިޔާސީ ގަރާރު ބާތިލުކުރަން މަދަނީ ކޯޓަށް ހުށަހަޅާފައިވާ މައްސަލަ އަވަސްކުރަން ސަރުކާރުން މަސައްކަތް ނުކުރަނީ ކީއްވެތޯ ވެސް ރައީސް ޔާމީން ވަނީ ސުވާލުކޮށްފައެވެ.
"މި ސަރުކާރުން އެކަމާ އެހާ ބޮޑަށް ބިރުގަންނަ ކަމަށްވާ ނަމަ އަޅުގަނޑު ހިތައް އަރަނީ ސަރުކާރުން ކީއްވެގެން ބާއޭ މިހާރު މަދަނީ ކޯޓުގަ އޮތް މައްސަލަ ކޮންމެވެސް އެއް ގޮތަކަށް ނުނިންމަނީ. އެ ވަހަށް ނިންމޭތޯ މަސައްކަތް ކުރަންވީ" ޔާމީން ވިދާޅުވިއެވެ.
ވެރިކަމަށް ވަޑައިގަތުމަށް ފަހު މިހާތަނަށް ހާމަ ކުރި އަދަދަކީ، ރާއްޖޭގައި ތިބީ އިންޑިއާގެ 89 ސިފައިން ކަމަށާއި ބާކީތިބި އިންޑިއާ ސިފައިން ރާއްޖޭން ދާނެ ތާރީހެއް ސަރުކާރަށް ބުނެވެންޖެހޭނެ ޔާމީން ވިދާޅުވިއެވެ.
