ހެލްތު މިނިސްޓްރީގެ އޮޑިޓް ރިޕޯޓްގައި ތުހުމަތުކޮށްފައިވާ މައްސަލަތައް ދަނީ ތަހުގީގު ކުރަމުން: ސީޕީ
ހެލްތު މިނިސްޓްރީގެ އޮޑިިޓް ރިޕޯޓްގައި ތުހުމަތުކޮށްފައިވާ މައްސަލަތައް ފުލުހުން ތަހުގީގު ކުރަމުން އަންނަ ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ޕީއެސްއެމްގެ ޕްރޮގްރާމެއްގައި ވާހަކަފުޅު ދައްކަވަމުން ޙަމީދު ވިދާޅުވީ، ހެލްތު މިނިސްޓްރީގެ ރިޕޯޓްގައި އޮޑިޓަރ ޖެނެރަލް ފާހަގަކުރައްވާފައިވާ މައްސަލަތައް ފުލުހުން ބަލަމުން އަންނަކަމަށާއި، އެމައްސަލަ ބެލުމުގައި ފުލުހުންގެ ދައުރެއްވެސް އޮންނަ ކަމަށެވެ. ކޮމިޝަނަރ ވިދާޅުވީ ހެލްތު މިނިސްޓްރީގެ އޮޑިޓް ރިޕޯޓްގައި ފާހަގަކޮށްފައި ހުރި މައްސަލަތައް ބަލަމުން އަންނަނީ ޖޮއިންޓް އިންވެސްޓިގޭޝަނެއްގެ ގޮތުގައިކަމަށެވެ. ނަމަވެސް އޭގެ އިތުރު ތަފްސީލެއް ސީޕީ ހަމީދު ނުދެއްވައެވެ.
"ތިފާހަގަކުރައްވާ އޮޑިޓަރ ޖެނެރަލްގެ ރިޕޯޓް ޚާއްޞަކޮށް ހެލްތު މިނިސްޓްރީގެ ތެރެއިން ހިންގާފައިވާ ކަންތައްތަކެއް ނުވަތަ ތުހުމަތުކުރެވޭ ކަންތައްތަކެއްގެ މައްޗަށް ބެލެވެމުންދާ މައްސަލާގައި ފުލުހުންގެ ބައިވެރިވުން ވެސް އެބައޮތް. އަޅުގަނޑުމެން ޖޮއިންޓް އިންވެސްޓިގޭޝަނެއް ހިންގަމުން ގެންދަނީ. އެތަޙްޤީޤް ކުރިއަށް އެބަދޭ." ޙަމީދު ވިދާޅުވިއެވެ.
ކޮވިިޑް-19އާ ގުޅިގެން ރާއްޖެއަށް ބޭނުންވާ ވެންޓިލޭޓަރުތަށް ގެނައުމުގައި ބޮޑެތި އޮޅުވާލުންތައް ހުރިކަމަށް އޮޑިޓް ރިޕޯޓްގައި ވަނީ ފާހަގަ ކުރައްވާފައެވެ. މިކަމުގައި އެންމެ ބޮޑު މައްސަލައަކަށް ފާހަގަކުރައްވާފައި ވަނީ ދުބާއީގެ ކުންފުންޏަށް ގެރެންޓީއަކާ ނުލައި އެޑްވާންސް ފައިސާ ދޫކުރި މައްސަލައެވެ. ދުބާއީގެ އެގްޒެކިއުޓަސް ޖެނެރަލް ޓްރޭޑިންގް އިން 75 ވެންޓިލޭޓަރު ގެނައުމަށް ރާއްޖެއިން އޯޑަރުކުރިއެވެ. އަދި ވެންޓިލޭޓަރުގެ އަގުގެ 90 ޕަސެންޓަށްވާ 30 މިލިއަން ރުފިޔާ ވަނީ ގެރެންޓީއަކާ ނުލައި އެޑްވާންސްގެ ގޮތުގައި އެ ކުންފުންޏަށް ޖަމާކޮށްފައެވެ.
މީގެ އިތުރުންވެސް އޮޑިޓް ރިޕޯޓްގައި ބުނެފައިވާގޮތުން ކޯވިޑާއި ގުޅިގެން ހެލްތު މިނިސްޓްރީން ކޮށްފައިވާ މުއާމަލާތަކުގައި މަކަރާއި ހީލަތް ހަދާފައިވާކަން ވަނީ ހާމަކޮށްފައެވެ. އޮޑިޓް ރިޕޯޓްގައި ތުހުމަތުކުރާ މައްސަލަތައް ފުލުހުން ތަޙްޤީޤްކުރަމުން އަންނައިރު، ރައްޔިތުންގެ މަޖިލީހުގެ މާލިއްޔަތު ކޮމިޓީންވެސް އަންނަނީ އޮޑިޓް ރިޕޯޓްގައިވާ މައްސަލަތައް ބަލަމުންނެވެ.
