ވޯޓާސް ލިސްޓުގައި ކެންޑިޑޭޓުން ސޮއިކުރުން މިރޭ 12އާ ހަމައަށް
ވޯޓާސް ލިސްޓުގައި ކެންޑިޑޭޓުންނަށް މިރޭ 12އާ ހަމައަށް ސޮއިކުރެވޭނެއެވެ.
ވޯޓަރސް ލިސްޓުގައި ސޮއި ކުރުން ކުރިއަށްދާނީ އިލެކްޝަންސް ކޮމިޝަނުން ދަރުބާރު ގޭގައި ގާއިމުކޮށްފައިވާ އިންތިޚާބާ ބެހޭ މަރުކަޒުގައެވެ. އީސީން ބުނެފައިވަނީ ސޮއިކުރުމުގެ ފުރުސަތު ލިބޭނީ ހޮނިހިރު ދުވަހުން ފެށިގެން މިރޭ 12:00އާ ހަމައަށް ކަމަށެވެ.
އީސީން ބުނީ ވޯޓުދިނުމުގެ ޙައްޤު ލިބިފައިވާ މީހުންގެ ފައިނަލް ލިސްޓުގައި ކެންޑިޑޭޓުންނާއި، ކެންޑިޑޭޓުންގެ މަންދޫބުންނަށް ވެސް ސޮއި ކުރެވޭނެ ކަމަށެވެ. ކެންޑިޑޭޓުންގެ ބަދަލުގައި ސޮއިކުރުމަށް ކަނޑައަޅާ ފަރާތްތަކުން ކެންޑިޑޭޓުގެ ސިޓީއަކާއި އައިޑީކާޑު ކޮޕީއެއް އަދި އައިޑީކާޑުގެ އަސްލު ގެންދަން ޖެހޭނެއެވެ.
މިހާރު ހުޅުވާލާފައިވާ ފުރުޞަތުގެ ބޭނުން ކެންޑިޑޭޓުން ފުރިހަމައަށް ހިފުމަށް އީސީން އެދެއެވެ.
އަންނަ އޭޕްރީލް މަހުގެ 21 ވަނަ ދުވަހު ބާއްވާ ރައްޔިތުންގެ މަޖިލިހުގެ ޖުމްލަ 284،663 މީހަކަށް ވޯޓުލުމުގެ ހައްޤު ލިބިގެންވާއިރު މީގެ ތެރޭގައި ހިމެނެނީ 139،361 އަންހެނުންނާއި 145،302 ފިރިހެނުންނެވެ.
20 ވަނަ ރައްޔިތުންގެ މަޖިލީހަށް މެންބަރުން އިންތިޚާބުކުުރުމަށް އަންނަ މަހު ބާއްވާ އިންތިޚާބުގައި 93 ދާއިރާއަކަށް 369 ކެންޑިޑޭޓުން ވާދަކުރައްވައެވެ.
