އަބްދުއްރަހީމްގެ ސުވާލެއް ޔާމީނަށް: ހެޔޮ ނިޔަތެއްނަމަ އިންތިހާބު ބޮއިކޮޓު ކުރަން އެންގުމުގެ ބޭނުމަކީ ކޮބައިތޯ?
ނިމިިދިޔަ ރިޔާސީ އިންތިހާބުގައި ކުރީގެ ރައީސް އަބްުދުالله ޔާމީނަށް ވާދަނުކުރެއްވޭކަން އެނގުމުން އިންތިހާބު ބޮއިކޮޓު ކުރަން އެމަނިކުފާނު އެންގީ އިޚްލާސްތެރި ނިޔަތުގައިތޯ ޕީއެންސީގެ ޗެއާޕާސަން އަދި ރައީސް ޑރ. މުހައްމަދު މުއިއްޒުގެ ހާއްސަ މުޝީރު އަބްދުއްރަހީމް އަބްދުالله ސުވާލު އުފައްދަވައިފިއެވެ.
އަބްދުއްރަހީމް މިފަދައިން ވިދާޅުވީ ޕީއެންއެފްގެ ޖަލްސާއެއްގައި ޔާމީން ދެއްކެވި ވާހަކަފުޅަކަށް ރައްދު ދެއްވަމުންނެވެ.
ޔާމީން ވިދާޅުވީ އެ މަނިކުފާނުގެ ކެންޑިޑެސީއާ މެދު ސުޕްރީމް ކޯޓުން ނިންމުމުގެ ކުރިން ޕީއެންސީގެ ކެންޑިޑޭޓެއް ހުންނާނީ ދައްކާފައި ކަމަށާއި އެހެންކަމުން ޕާޓީ މަގުމަތިކުރަން އުޅުނު ކަމަށް ބުނާ ވާހަކައަކީ ދެކޮޅު ޖެހޭ ވާހަކައެއް ނޫން ކަމަށެވެ.
އެ ވާހަކައަށް ރައްދު ދެއްވަމުން އަބްދުއްރަހީމް "އެކްސް"ގައި ވިދާޅުވީ އޮގަސްޓު 7 ވަނަ ދުވަހު ރައީސް މުއިއްޒުގެ ކެންޑިޑެސީ ފޯމު ހުށަހެޅުއްވީ ޔާމީން ސޮއިކުރައްވާ ކަމަށާއި އޭގެ ކުރީ ދުވަހު ޔާމީނަށް ވާދަނުކުރެވޭ ކަން އެނގުމުން އެ ދުވަހު އިންތިހާބު ބޮއިކޮޓު ކުރަން އެންގިކަމަށެވެ.
"ރައީސް ޔާމީނަށް ރިޔާސީ އިންތިޚާބުގައި ވާދަ ނުކުރެވޭނެކަމަށް ސްޕްރީމް ކޯޓުން ޙުކުމް ކުރީވެސް 6 އޯގަސްޓް 2023ގައި. ޕީއެންސީ އިން ރިޔާސީ ކެނޑިޑޭޓަކު ދައްކަން އެންގެވި އެންގެވުމަކީ އިޚްލާޞްތެރި ނިޔަތެއް އޮވެގެން އެންގެވި އެންގެވުމެއް ނަމަ ސްޕްރީމް ކޯޓްގެ ޙުކުމާ ގުޅިގެން ޕީޕީއެމް/ޕީއެންސީ އިން ރިޔާސީ އިންތިޚާބް ބޮއިކަޓްކުރަން އެންގެވުމުގެ ބޭނުމަކީ ކޮބައިތޯ؟," އަބްދުއްރަހީމް ސުވާލު އުފެއްދެވިއެވެ.
އޭނާ ވަނީ ޕީޕީއެމް އަށް ދިރުން ލިބެން ބޭނުންވި ނަމަ ވަގުތު އޮއްވާ ޕީޕީއެމް އިން ރިޔާސީ ކެނޑިޑޭޓަކު ދައްކަން އިރުޝާދު ނުދެއްވީ ކީއްވެގެންތޯ ވެސް ޔާމީނާ ސުވާލުކުރައްވައިފަ އެވެ.
އަބްދުއްރަހީމް ވިދާޅުވީ މި ޙަގީގަތްތައް މިހެން ހުރީމަ މަގުމަތިކުރަން އުޅުނު ވާހަކަ މި ދައްކަނީ ރައްޔިތުންނަށް ކަން ހިގައި ދިޔަގޮތް އޮޅުން ފިލުވައި ދިނުމަށްޓަކައި ކަމަށެވެ.
Ads by STO
