މިފަހަރު ވަގަށް ނެގީ ދަމު ނަމާދަށް ހުރި މީހެއްގެ ފޯނާއި ވޮލެޓު
މާލޭ މިސްކިތެއްގައި ރޭ ދަމުނަމާދަށް ހުރި އަންހެނެއްގެ ފޯނާއި ވޮލެޓް ވަގަށް ނަަގައިފިއެވެ.
ފޯނާއި ވޮލެޓު ވަގަށް ނަގާފައި ވަނީ ސަލާހުއްދީން މިސްކިތުގައި ނަމާދަށް ހުއްޓާ ރޭ 03:10 ހާއިރުއެވެ.
ފުލުހުން ވިދާޅުވީ މި މައްސަލައާއި ގުޅިގެން 36 އަހަރުގެ ދިވެހި ދެ ފިރިހެނުން މިއަދު ހެނދުނު ހައްޔަރުކޮށްފައިވާ ކަމަށެވެ.
މި މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ވިދާޅުވިއެވެ.
ރޯދަ މަސްތަކުގައި ވައްކަމުގެ މައްސަލަތައް އިތުރުވާއިރު، ދާދި ފަހުން ވަނީ މިސްކިތަކުން ފަންކާ އެއް ވަގަށް ނެގި މީހަކު ވެސް ހައްޔަރުކޮށްފައެވެ. މީގެ އިތުރުން ދަރުމަވަންތަ މިސްކިތުން ފެން މޯޓަރެއް ވަގަށް ނެގި މައްސަލައެއް ވެސް ވަނީ ފެންމަތިވެފައެވެ.
މިމަހުގެ 18 ވަނަދުވަހު މާލޭގެ 2 މިސްކިތެއްގައި އަންހެނުން ނަމާދުކުރާ ބަޔަށްވެސް ގެއްލުން ދިން މައްސަލައެއް ފުލުހުން ދަނީ ތަހުގީގުކުރަމުންނެވެ.
