މަދީނާގައި ކިޔަވާ ދިވެހި ދަރިވަރުންނާއި ރައީސް ބައްދަލުކުރައްވައިފި
މަދީނާގައި ތައުލީމް ހާސިލްކުރަމުންދާ ދިވެހި ދަރިވަރުންނާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ބައްދަލުކުރައްވައިފިއެވެ.
ރައީސް އޮފީހުން ބުނީ، އެ ދަރިވަރުންނާއި ރައީސް ބައްދަލުކުރައްވާފައިވަނީ މަދީނާގައި ކަމަށެވެ. އަދި މި ބައްދަލުވުމުގައި ދިވެހި 24 ދަރިވަރުން ބައިވެރިވެފައިވާ ކަމަށާއި، ދަރިވަރުންވަނީ އެކުދިން ބޭނުންވާ ކަންކަމާއި, އެކުދިންގެ ހުރި ކަންބޮޑުވުންތައް ރައީސްއާއި ހިއްސާކުރައްވާފައިި ކަމަށް ވެސް އެ އޮފީހުން ބުނެއެވެ.
އިތުރަށް ރައީސް އޮފީހުން ބުނީ، މަދީނާގައި ތިބި ދަރިވަރުންގެ ކަންބޮޑުވުން އަޑު އެއްސެވުމަށްފަހު، އެ ދަރިވަރުން ފާހަގަކުރެއްވި ކަންކަން ބައްލަވައި އަދި އެކަންކަން ކޮށްދެއްވުމަށް މަސައްކަތްޕުޅު ކުރައްވާނެކަމުގެ ޔަގީންކަން ރައީސް ދެއްވާފައިވާ ކަމަށެވެ.
ރައީސްގެ މި ދަތުރުފުޅަކީ ދެ ހަރަމްފުޅުގެ ހާދިމް އަދި ސައުދީ ރަސްގެފާނު ކިންގް ސަލްމާން ބިން އަބްދުލްއަޒީޒްގެ ހާއްސަ މެހެމާންދާރީގައި ކުރައްވާ ދަތުރުފުޅެކެވެ. ރައީސް އާއި ރައީސްގެ އަނބިކަނބަލުން ސާޖިދާ މުހައްމަދުގެ އަރިހުގައި ސަރުކާރުގެ އިސްވަފުދެއް ވެސް މި ދަތުރުފުޅުގައި ބައިވެރިވެވަޑައިގެންނެވިއެވެ.
މި ދަތުރުފުޅުގައި ރައީސް އަރިހުގައި ވަޑައިގެންނެވި ވަފުދުގައި ހިމެނިވަޑައިގަންނަވަނީ އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދާއި އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފްއެވެ. މީގެއިތުރުން ރައީސް އޮފީހުގެ ޗީފް އޮފް ސްޓާފް އަބްދުالله ފަޔާޒް އާއި ރައީސް އޮފީހުގެ މިނިސްޓަރު އަލީ އާރިފް އަދި ރައީސް އޮފީހުގެ މިނިސްޓަރު އަބްދުالله ނާސިރެވެ.
