އެމްއެމްޕީއާރުސީގެ ޗެއާޕާސަން ކަމުން ނޫރައިން އިސްތިއުފާ ދެއްވައިފި
އެމްއެމްޕީއާރުސީގެ ޗެއާޕާސަން ކަމުގެ މަގާމުގައި ހުންނެވި އައިޝާ ނޫރައިން ޖަނާހު، އެ މަގާމުން އިސްތިއުފާ ދެއްވައިފި އެވެ.
ނޫރައިން އިސްތިއުފާ ދެއްވިކަން ކަށަވަރުވި ނަމަވެސް އިސްތިއުފާ ދެއްވި ސަބަބެއް އަދި ނޭނގެ އެވެ. ނޫރައިން އެމްއެމްޕީއާރުސީގެ ޗެއާޕާސަންގެ މަގާމަށް އައްޔަން ކުރެއްވީ ޑިސެމްބަރު 27، 2023 ގައެވެ.
ނޫރައިން ކުއްލި ގޮތަކަށް މަގާމުން އިސްތިއުފާ ދެއްވާފައިވާއިރު، ދުބާއީގައި މި މަހު ކުރީކޮޅު އޮތް އަރަބިއަން ޓްރެވެލް މާކެޓް (އޭޓީއެމް) ފެއާގައި އިނގިރޭސީ ބަހުން ދެއްވި އިންޓަވިއުއަކާ ގުޅިގެން އާންމުންގެ މެދުގައި އޭނާ ވަނީ މަގުބޫލުކަން ހޯދައިފަ އެވެ.
އޭގެ ފަހުން އެ ކުންފުނިން ބައިވެރިވާ ބޭރުގެ ހަރަކާތްތަކުގައި ނޫރައިން ބައިވެރިނުކުރަން ޓޫރިޒަމް މިނިސްޓަރު އިބްރާހީމް ފައިސަލް އެންގެވި ކަމަށް ބުނެ މީޑިއާއަކުން ވަނީ ރިޕޯޓްކޮށްފަ އެވެ. ނަމަވެސް އެކަން މިނިސްޓަރ ފައިސަލް ވަނީ ދޮގު ކުރައްވައިފަ އެވެ. މިކަމާއި ގުޅިގެން ނޫރައިންއާއި ފައިސަލް އަށްވެސް ފާޑުކިޔުން އަމާޒުވި އެވެ.
ނޫރައިން އަކީ ރައީސް ޑރ. މުހައްމަދު މުއިއްޒު މިނިސްޓަރުންގެ ފެންވަރުގައި އައްޔަން ކުރައްވާފައިވާ ޕްރިންސިޕަލް އެޑްވައިޒާ އޮން ޓްރޭޑް އެންޑް އިންވެސްޓްްމަންޓު މުހައްމަދު އަލީ ޖަނާހުގެ ދަރިކަނބަލުންނެވެ.
Ads by STO
