މަގާމުތަކަށް ބަދަލު ގެންނަނީ ހިންގުން ހަރުދަނާކުރަން: ތަރުޖަމާނު
ސަރުކާރުގެ ސިޔާސީ މަގާމުތަކުން މީހުން ވަކިކުރުމާއި ސަސްޕެންޑްކުރަމުން ދަނީ ހިންގުން ހަރުދަނާ ކުރުމަށް ކަމަށް ރައީސް އޮފީހުން މިއަދު ބުނެފި އެވެ.
ރައީސް އޮފީހުގައި މިއަދު ބޭއްވި ޕްރެސް ބްރީފިންގައި ނޫސްވެރިއަކު ވަނީ ސިޔާސީ މަގާމުތަކަށް ގެންނަ ބަދަލުތަކާއި ގުޅުވައި ސުވާލުކޮށްފަ އެވެ. އަދި ސަބަބު އޮޅުންފިލުވައިދޭން އެދިފަ އެވެ.
އެ ސުވާލުގެ ޖަވާބުގައި ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ، ސަރުކާރު ހިންގުމުގައި ފަސޭހަ ގޮތަކަށް ކަންކަން ބައްޓަން ކުރެއްވުމުގެ ބާރު ރައީސުލްޖުމްހޫރިއްޔާ އަށް ލިބިވަޑައިގަންނަވާ ކަމަށެވެ. އެއީ ކުންފުނިތަކަށް މީހުން އައްޔަންކުރުމާއި ބަދަލުކުރުން ފަދަ ކަންކަންވެސް ހިމެނޭ ކަމަށް ވިދާޅުވި އެވެ. އެހެންވެ އެގޮތުގެ މަތިން ރައީސް ޑރ މުހައްމަދު މުއިއްޒު، ސަރުކާރާ ސަރުކާރު ހިއްސާވާ ކުންފުނިތަކުގެ މަގާމުތަކަށް ބަދަލުތަކެއް ގެންނަވަމުންދާ ކަމަށެވެ. ނަމަވެސް ވަކި ސަބަބެއް ހީނާ ވިދާޅެއް ނުވެ އެވެ.
އެހެންވީމަ އެގޮތުގެ މަތިން ސަރުކާރު ހިންގުމުގައި އެމަނިކުފާނަށް [ރައީސް] ބޭނުންފުޅުވާ ކަންތައް ރަނގަޅުކުރުމަށްޓަކައި ނުވަތަ އިތުރަށް ހަރުދަނާކޮށް ރަނަގޅު ކުރުމަށްޓަކައި ކުރައްވަން ޖެހޭ ކަންތައް އެބަކުރައްވާ
އިއްޔެއިން ފެށިގެން ސަރުކާރުގެ ބައެއް އިސް މަގާމުތަކުން މީހުން ވަކިކުރުމާއި ސަސްޕެންޑްކުރުމުގެ ކަންތަކެއް ހިނގަމުން އެބަދެ އެވެ. ސަރުކާރު ކުންފުނިތަކެއްގެ އިސް މަގާމުތަކުގެ ތިބި ބަޔަކު ވަކިކޮށްފައިވެ އެވެ. އަދި އެމްއެމްޕީއާރުސީން ދެ ބޯޑު މެންބަރަކު އިސްތިއުފާ ދީފައިވެސް ވެ އެވެ.
ވަރަށް ކުރީއްސުރެން ޔޫތު މިނިސްޓްރީގެ ތިން ޑެޕިއުޓީ މިނިސްޓަރަކު ތިއްބެވީ ސަސްޕެންޝަނުގަ އެވެ. ފާތިމަތު މަލްޝާ ޝަރީފް، މަރިޔަމް ޝިއުނާ، އަދި މަހުޒޫމް މާޖިދު މިދިޔަ ޖެނުއަރީގައި ސަސްޕެންޑްކުރީ އަވައްޓެރި އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސްކޮށް ޕޯސްޓުކުރި މައްސަލާގަ އެވެ.
