ކުދި ޖަޒީރާ ގައުމުތަކުގެ ކޮންފަރެންސަށް ރައީސް މާދަމާ ފުރާވަޑައިގަންނަވަނީ
ސްމޯލް އައިލެންޑް ޑިވެލޮޕިންގް ސްޓޭޓްސް (ސިޑްސް) ނުވަތަ ކުދި ޖަޒީރާ ގައުމުތަކުގެ ކޮންފަރެންސްގެ ހަތަރުވަނަ އެޑިޝަންގައި ބައިވެރިވެވަޑައިގެންނެވުމަށް ރައީސް ޑރ. މުހައްމަދު މުއިއްޒު އެންޑިގުއާ އެންޑް ބާބިއުޑާއަށް ވަޑައިގަންނަވަން ހަމަޖެހިއްޖެ އެވެ.
މި ކޮންފަރެންސް އޮންނާނީ އެންޓިގުއާ އެންޑް ބާބިއުޑާގެ ސެއިންޓް ޖޯންސްގައި މިމަހުގެ 27 އިން 30 އަށެވެ. މި ކޮންފަރެންސް ބާއްވަމުން އަންނަނީ ކޮންމެ 10 އަހަރަކުން އެއްފަހަރު އެވެ. މި ކޮންފަރެންސްގައި އދ. ގެ 37 މެމްބަރު ގައުމުން ބައިވެރިވާނެ އެވެ.
މި ދަތުރުފުޅުގައި ރައީސްގެ އަރިހުގައި އެންވަޔަރަމެންޓް މިނިސްޓަރު ތޯރިގް އިބްރާހިމް، ފޮރިން މިނިސްޓަރު މޫސާ ޒަމީރު، ހައުސިން މިނިސްޓަރު ޑރ. އަލީ ހައިދަރުގެ އިތުރުން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދާއި ކްލައިމެޓް ޗޭންޖް އެންވޯއީ އަލީ ޝަރީފް އަދި އެމްބެސެޑާ އެޓް ލާޖް އަލީ ނަސީރު މުހައްމަދާއި ޗީފް އޮފް ޕްރޮޓޮކޯލް މުހައްމަދު ޝަހުދީ ބައިވެރިވެވަޑައިގަންނަވާނެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ސަރުކާރުން ބުނީ ކޮންފަރެންސްގައި ބައިވެރިވާ ރާއްޖޭގެ ވަފުދު މާދަމާ ފުރާވަޑައިގަންނަވާނެ އެވެ. މިފަހަރުގެ ކޮންފަރެސްގައި ރާއްޖެއަކީ ކޯ ޗެއާ އެވެ. އެހެންކަމުން ޖުމްލަ ހަތް ސްޓޭޓްމެންޓެއް ރައީސް މުއިއްޒު ދެއްވާނެ އެވެ. އަދި ރާއްޖޭގެ ފަރާތުން ތިން ސައިޑް އިވެންޓެއްވެސް ބާއްވާނެ އެވެ.
ކުދި ޖަޒީރާ ގައުމުތަކުގެ ކޮންފަރެންސާއި ގުޅޭ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގެ ތެރެއިން
މިއަދު ހެނދުނު ބޭއްވި ނޫސްވެރިންގެ ބައްދަލުވުމުގައި ކޮންފަރެންސާއި ގުޅޭގޮތުން މައުލޫމާތު ދެއްވަމުން އެންވަޔަރަންމެންޓް މިނިސްޓަރު ތޯރިގު ވިދާޅުވީ މިއަހަރުގެ ކޮންފަރެންސްގައި އެންމެ ބޮޑަށް މަސައްކަތް ކުރައްވާނީ ކްލައިމެޓް ފައިނޭންސް ފަސޭހަ ގޮތެއްގައި ކުދި ޖަޒީރާ ގައުމުތަކަށް ލިބޭނެ ގޮތްތައް ހޯއްދެވުމަށް ކަމަށެވެ.
ރައީސް މުއިއްޒުގެ މި ދަތުރުފުޅުގައި އެހެން ގައުމުތަކުގެ ރައީސުންނާއި ބައްދަލުކުރައްވައި މަޝްވަރާތައް ކުރިއަށް ގެންދާނެ އެވެ. މީގެ އިތުރުން ކޮންފަރެންސަށް ވަޑައިގަންނަވާ ވަޒީރުންވެސް އެހެން ގައުމުތަކުގެ ވަޒީރުންނާއި ބައްދަލުކުރައްވައި މަޝްވަރާތައް ކުރިއަށް ގެންދަވާނެ އެވެ.
މި ދަތުރަކީ ބޮޑު ހަރަދެއް ހިނގާނެ ދަތުރަކަށްވުމުން ރާއްޖެއިން ވަޑައިގަންނަވާ ވަފުދު ވީހާވެސް ކުޑަ ކުރުމަށް ސަރުކާރުން މަސައްކަތް ކޮށްފައިވާކަމަށް ސްޕޯކްސްޕާސަން ހީނާ ވަލީދު ވިދާޅުވި އެވެ.
