ހިދުމަތްތައް ހޯދަން މެންބަރުން ގާތު ސަލާން ޖެހުން ނިމުމަކަށް ގެންނަން މަސައްކަތްކުރާނަން: އަޒާން
އާސަންދަ، އެންސްޕާ ފަދަ ހިދުމަތްތަކަށް ހައްލެއް ގެނައުމަށް 20 ވަނަ މަޖިލީހުގައި މަސައްކަތް ކުރާނެ ކަމަށް ހިތަދޫ މެދު ދާއިރާގެ މެމްބަރު އަހުމަދު އަޒާން ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި އަޒާން ވިދާޅުވީ އާސަންދަ, އެންސްޕާ, ސްޓުޑެންޓް ލޯނު, ވިޔަފާރި ލޯނު, ބިދޭސީ ކޯޓާ, ދަރުމަވަންތަ ޕްރައިވެޓް ކޮޓަރި އަދި މި ނޫންވެސް ސަރުކާރުން ރައްޔިތުންނަށް ދޭ ހިދުމަތްތަކަކީ ކޮންމެ ރައްޔިތަކަށްވެސް އުސޫލުގެ ތެރެއިން އިންސާފުވެރިކަމާއި އެކު ލިބެންޖެހޭ ހިދުމަތްތައް ކަމަށެވެ.
މަޖިލީސް އިންތިހާބަށް ކުރިމަތިލީ ދުވަހުން ފެށިގެން ވެސް އެންމެ ގިނަ ރައްޔިތުން ގުޅަނީ މިފަދަ ކަންކަމުގައި ކަމަށާއި އެހެން އެކަން ވާންޖެހެނީ ނިޒާމުގެ ތެރެއިން ހިދުމަތް ލިބުމުގައި ލަސްކަމާއި, ދަތިކަން އުޅޭތީ ކަމަށް އަޒާން ވިދާޅުވިއެވެ.
“ދާއިރާގެ މެމްބަރަށް ގުޅައިގެން ނޫނީ ނުފޫޒުގަދަ އެހެން މީހަކަށް ގުޅައިގެން މި ކަންކަން ކުރަން ޖެހިފައި އޮތް އޮތުން ނިމުމަކަށް ގެންނަން ޖެހޭ” އަޒާން ވިދާޅުވިއެވެ.
އެހެންކަމުން މި މައްސަލައަށް ހައްލު ހޯދައި ދިނުމަށް 20ވަނަ މަޖިލީހުގައި މަސައްކަތް ކުރާނެ ކަމަށް އަޒާން ވިދާޅުވިއެވެ.
ވިހިވަނަ ރައްޔިތުންގެ މަޖިލީހަށް އިންތިހާބުވި 93 މެންބަރުން، ކުރިއަށް އޮތް ފަސް އަހަރަށް މަޖިލިސް މެންބަރުކަމުގެ ހުވާ ކޮށްފައިވަނީ އިއްޔެއެވެ.
