ހާފިޒްގެ އާއިލާއަށް ރައީސްގެ ތައުޒިޔާ
ކުޅިވަރާއި ތައުލީމަށާއި މަސްވެރިކަމަށް ވަރަށް ގިނަ ހިދުމަތް ކުރައްވާފައިވާ އަހުމަދު ހާފިޒް އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެެއްޖެއެވެ.
އެކްސްގައި ރަސްމީ އެކައުންޓުން ކުރެއްވީ ޕޯސްޓެއްގައި ރައީސް ވަނީ ދިވެހި ދައުލަތަށާއި އަދި ޕީޕީއެމް/ގެ އިތުރުން ރާއްޖޭގެ ކުޅިވަރަށް އަގުނުކުރެވޭފަދަ ހިދުމަތްތަކެއް ކުރެއްވި ހާފިޒް އަވަހާރަވުމާ ގުޅިގެން މަރްހޫމްގެ އާއިލާއަށް ތައުޒިޔާ ފޮނުއްވާފައެވެ.
ހާފިޒް ނިޔާވީ އުމުރުފުޅުން 62 އަހަރުގައެވެ. އާއިލާއިން މަޢުލޫމާތު ދީފައިވާ ގޮތުގައި ހާފިޒް ނިޔާވީ އައިޖީއެމްއެޗް ގައި ކެންސަރު ބައްޔަށް ފަރުވާ ހޯއްދަވަމުން ދަނިކޮށެވެ.
ހާފިޒަކީ މަސްވެރިކަމުގެ ދާއިރާގައި ރާއްޖޭގައި ތިއްބެވި މަދު ތަޖުރިބާކާރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އޭނާ ވަނީ 1999 ވަނަ އަހަރުން ފެށިގެން 2004 އަކާ ހަމައަށް ރާއްޖޭގެ މެރިން ރިސާޗް ސެންޓަރުގެ ޑިރެކްޓަރުކަން ކުރައްވަވާފައެވެ.
ތައުލީމީ ދާއިރާގައި ވެސް ހާފިޒް ވަނީ ގިނަ މަސައްކަތްތަކެއް ކުރައްވާފައެވެ. އެގޮތުން އަހުމަދިއްޔާ ސްކޫލުގެ އެސިސްޓެންޓް ޕްރިންސިޕަލްގެ މަގާމުވެސް އޭނާ ވަނީ ގިނަ އަހަރުތަކެއް ވަންދެން ކުރައްވަވާފައެވެ.
انالله وانااليه راجعون
اللهم اغفرله وارحمه وعافه
واعف عنه