ރައީސް ޔާމީން މިނިވަން ކުރުމަށް ގޮވާލާ އައްޑޫގައި ސައިކަލު ބުރެއް ބާއްވައިފި
ކުރީގެ ރައީސް އަބްދުﷲ ޔާމީން އަބްދުލްޤައްޔޫމް މިނިވަން ކުރުމަށް ގޮވާލާ އައްޑޫ ސިޓީގައި އިދިކޮޅު ފަރާތްތަކުން ސައިކަލު ބުރެއް ބާއްވައިފިއެވެ.
ހުޅުދޫ ދާއިރާގެ ކުރީގެ މެމްބަރު މުހައްމަދު ޝާހިދު (ޝާޑު) އިސްކޮށް ހުންނަވައި، ހުޅުދޫގައި މިއަދު ހަވީރު ކުރިއަށް ގެންދިޔަ މި ސައިކަލު ބުރުގައި ޔާމީން މިނިވަން ކުރުމަށް ގޮވާލާ ހަދާފައިވާ ޕޯސްޓަރުތަކަކާއި ސަރުކާރަށް ފާޑުކިޔުމުގެ ތަފާތު އެކި ޝުއޫރުތައް ހިމެނޭ ޕޯސްޓަރުތައް ބޭނުން ކޮށްފައިވެއެވެ.
މީގެ ކުރިން އިދިކޮޅުން ވަނީ މާލޭގައި ވެސް ސަރުކާރާ ދެކޮޅަށް ސައިކަލު ބުރެއް ބާއްވާފައެވެ. މި ސައިކަލު ބުރުގައި އެޗްޕީއޭގެ މިންގަނޑުތަކާއި އެއްގޮތަށް ގައިދުރުކަން ނުބަހައްޓާ ހަރަކާތްތެރިވުމާއި މާސްކު ނާޅާ އުޅެފައިވާ މައްސަލަ ފުލުހުން އަންނަނީ ތަހުގީގު ކުރަމުންނެވެ. މި މައްސަލައިގައި ފުލުހުން ވަނީ އިދިކޮޅުގެ ބައެއް އިސްވެރިން ވަނީ ޖޫރިމަނާ ކޮށްފައެވެ.
ހަލުވިކަމާއެކު ފެތުރެމުންދާ ކޮވިޑް-19 އިން ރައްކާތެރި ކުރުމުގެ ގޮތުން އެޗްޕީއޭ އިން ވަނީ ފިޔަވަޅުތަކެއް އަޅާފައެވެ. އެގޮތުން ބޭރުގައި އުޅޭއިރު މާސްކު އެޅުމަށާއި، އެކަކު އަނެކަކާއި މަދުވެގެން ތިން ފޫޓު ދުރުމިން ބެހެއްޓުމަށް ވެސް އަންގާފައިވެއެވެ.
Ads by STO
