ތިން ވަޒީރުންގެ ނަން ދިރާސާ ކުރުމަށް ކޮމިޓީއަށް ފޮނުވައިފި
ތިން ވަޒީރުންނަށް ރުހުން ދިނުމުގެ ކުރިން، ދިރާސާ ކުރުމަށް އަލުން ކޮމިޓީއަށް ފޮނުވައިފި އެވެ.
ރައީސް ޑރ. މުހައްމަދު މުއިއްޒުގެ ކެބިނެޓުގައި ހިމެނިވަޑައިގަންނަވާ 22 ވަޒީރުންގެ ތެރެއިން 3 ވަޒީރަކަށް ރުހުން ނުދޭން، އެމްޑީޕީގެ މެޖޯރިޓީ އޮތް 19 ވަނަ ރައްޔިތުންގެ މަޖިލީހުން ނިންމި އެވެ. އެއީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު، އެޓާނީ ޖެނެރަލް އަހުމަދު އުޝާމްގެ އިތުރުން ހައުސިންގް މިނިސްޓަރު ޑރ. އަލީ ހައިދަރެވެ.
މި ތިން ވަޒީރުންނަށް ރުހުން ދިނުމަށް އަލުން މިވަނީ 20 ވަނަ ރައްޔިތުންގެ މަޖިލީހަށް ނަން ފޮނުއްވައިފަ އެވެ. މިމައްސަލައިގައި މިއަދު ނިންމާފައިވަނީ ނަންތައް ދިރާސާ ކުރުމަށް މަޖިލީހުގައި އޮންނަ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުވާށެވެ.
ތިން ވަޒީރުންނަށް ރުހުން ނުދޭން 19 ވަނަ މަޖިލީހުން ނިންމި ނަމަވެސް އެގޮތަށް ނިންމިތާ މަދު ވަގުތުކޮޅެއްގެ ތެރޭގައި ރައީސް މުއިއްޒު ވަނީ ހަމަ އެބޭފުޅުން އެ މަގާމުތަކަށް އައްޔަނު ކުރައްވައިފަ އެވެ.
20 ވަނަ މަޖިލީހުގައި އޮތީ ޕީއެންސީގެ ސުޕަ މެޖޯރިޓީ އެވެ. އެހެންކަމުން މި ވަޒީރުންނަށް ރުހުން ލިބޭނެކަމަށް ބެލެވެ އެވެ.
Ads by STO
