ސައިކަލުތަކުގައި ގަސްދުގައި ރޯކޮށްލި ކަމުގެ ހެއްކެއް ނެތް: ފުލުހުން
ހެންވޭރު މެހެލިގޯޅީގައި ޕާކުކޮށްފައި ހުރި ސައިކަލްތަކެއްގައި ރޯވި އެނދި ހާދިސާގައި ގަސްދުގައި ބަޔަކު އަލިފާން ރޯކޮށްލި ކަމުގެ ހެއްކެއް ނެތް ކަމަށް ފުލުހުން ބުނެފިއެވެ.
ހެންވެރު އެފްއެސްއެމް ޕެޓްރޯލް ޝެޑް ކައިރީގައި އެ ހާދިސާ ހިނގާފައިވަނީ ރޭ ދަންވަރު 00:27 ހާއިރު އެވެ.
ފުލުހުން މިއަދު ބުނީ މި މައްސަލާގައި މިހާތަނަށް ތަހުގީގަށް ބެލެވެނީ އަލިފާން ރޯވި ކަމަށާއި ގަސްދުގައި ބަޔަކު ކުރި ކަމެއް ނުބެލެވޭ ކަމަށެވެ. އަދި އެފަދަ ހެއްކެއް ވެސް ލިބިފައިނުވާ ކަމަށް ފުލުހުން ބުންޏެވެ.
އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރ ފައިޓަރުން ވަނީ އެ ސަރަހަށްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ. ރޯވި އަލިފާން ގަނޑު ނިއްވާލެވިފައިވަނީ 00:42 ހާއިރު ކަމަށް އެމްއެންޑީއެފުން ބުނެފައިވެއެވެ.
މި ހާދިސާގައި ފަސް ސައިކަލެއް ބޭނުން ނުކުރެވޭ ވަރަށް ވަނީ އަނދާފައިވާއިރު އެއްވެސް މީހަކަށް ގެއްލުމެއް ލިބިފައިނުވެއެވެ.
