ހުޅުމާލޭގައި ދެ އެކްސިޑެންޓެއް, އެކަކުގެ ހާލު ސީރިއަސް
ހުޅުމާލޭގައި މިއަދު ދެ އެކްސިޑެންޓެއް ހިނގައިފިއެވެ.
މިއަދު ފުރަތަމަ އެކްސިޑެންޓް ހިނގާފައިވަނީ ހެނދުނު 8:13ގައެވެ. ދެވަނަ އެކްސިޑެންޓް ހިނގާފައިވަނީ 9:45ގައެވެ. މި ދެ އެކްސިޑެންޓް ވެސް ހިނގާފައިވަނީ ހުޅުމާލޭ ފޭޒް ދޭއްގައެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ މިއަދުގެ ފުރަތަމަ އެކްސިޑެންޓް ހިނގާފައިވަނީ ހިޔާ ފްލެޓް އެޗް5 ކައިރީ ކާރެއްގައި ސައިކަލެއް ޖެހި, ސައިކަލު ކޮންޓްރޯލް ނުވެގެން ގޮސް އެހެން ކާރެއްގައި ޖެހިގެން ކަމަށެވެ. ސައިކަލު ދުއްވަން އިނީ 19 އަހަރުގެ ފިރިހެނެއް ކަމަށާއި އޭނާ އަތުގައި ލައިސެންސް ނެތް ކަމަށް ވެސް ފުލުހުން ބުންޏެވެ. އަނިޔާވި މީހާގެ ހާލު ސީރިއަސް ކަަމަށް ހޮސްޕިޓަލުން މައުލޫމާތު ދެއެވެ.
ދެވަނަ އެކްސިޑެންޓް ހިނގާފައިވަނީ 9:45ގައެވެ. މި އެކްސިޑެންޓް ހިނގާފައިވަނީ ދެ ސައިކަލު ޖެހިގެންނެވެ. އޭގެ ތެރެއިން އެއް ސައިކަލު ދުއްވަން އިނީ 21 އަހަރުގެ ލައިސެންސް ނެތް މީހެކެވެ. އަނެއް ސައިކަލު ދުއްވަން އިނީ 33 އަހަރުގެ ދިވެހި އަންހެނެކެވެ. މި އެކްސިޑެންޓް ހިނގާފައިވަނީ ވެސް ހުޅުމާލޭ ފޭޒް ދޭއްގައެވެ.
މި ދެ މައްސަލަ ފުލުހުން ގެންދަނީ ތަޙްޤީޤް ކުރަމުންނެވެ.
