މެމްބަރުންގެ އަދަދު އޮބި ނެތް މިންވަރަށް، އެރި މިއުޅެނީ އިސްކޮޅު ނުކާ ހިސާބަށް: ނާޒިމް
މަޖިލިސް މެމްބަރުންގެ އަދަދު އިތުރުވަމުން މިދަނީ އޮބި އޮންނަ މިންވަރަށް ނޫން ކަމަށް ވިދާޅުވެ މެމްބަރުންގެ އަދަދު ހިފެހެއްޓުމަށް ދިއްގަރު ދާއިރާގެ މެމްބަރު އަދި ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ގޮވާލައްވައިފި އެވެ.
ނާޒިމް މިފަދައިން ވިދާޅުވީ ބާރަށު ދާއިރާގެ މެމްބަރު އިބްރާހިމް ޝުޖާއު އިއްޔެ ހުށަހެޅުއްވި ގަރާރަށް ބަހުސް ކުރައްވަމުންނެވެ. ޝުޖާއުގެ ގަރާރުގައި ވަނީ މެމްބަރުންގެ އަދަދު ހިފެހެއްޓުމާއި ގުޅޭގޮތުން މެމްބަރުންގެ ހިޔާލު ހޯދަން ހުށަހަޅައިފަ އެވެ.
ނާޒިމް ވިދާޅުވީ ންމެ 5،000 ރައްޔިތަކަށް މެންބަރަކު ހުންނަންޖެހޭ ގަވާއިދު ވުޖޫދަށް ގެނައި މަޖިލީހުގައި އޭނާ ވެސް ހިމެނޭ ކަމަށެވެ. ނަމަވެސް، އޭރު ޚާއްސަ މަޖިލީހުގައި ބަހުސްކުރެވުނު ގޮތަށް މިހާރު ކަންތައްތައް ކުރިއަށްނުދާ ކަމަށް ނާޒިމް ވިދާޅުވި އެވެ.
"މިއިކީ އަޅުގަނޑު ދަންނަވާނީ އޮބި އޮންނަ ވަރެއް ނޫން. މީގައި ހައްސާސް މައްސަލައަކީ ކޮންމެ 5،000 މެންބަރަކަށް ގޮނޑިއެއް ކަނޑައަޅަންޖެހޭ ގޮތަށް ގާނުނުގައި ބަޔާންކޮށްފައި އޮތުން. ބައިނަލްއަގުވާމީ ގޮތުން މި ކަންތައްތައް އޮންނަނީ ކިހިނެއްތޯ ބަލަން އެބަޖެހޭ. މިކަމަކީ ދުނިޔޭގެ އެހެން ގައުމުތަކުން ކުރިމަތިލާ ހައްލުކޮށްފައިވާ މައްސަލައެއް"
އޮބި ނެތް އަދަދެއްކަމަށް ނާޒިމް ފާހަގަކުރެއްވި 2029 ވަނަ އަހަރު ރައްޔިތުންގެ މަޖިލީހުގައި 108 މެމްބަރުން ތިއްބަވާނެތީ އެކަމަށެވެ. ބައިނަލްއަގުވާމީ ގޮތުން މިފަދަ މައްސަލަތަކުގައި ކަން ކުރާ އުސޫލަށް ރާއްޖެއިންވެސް ރިއާޔަތް ކުރަންޖެހޭކަން ފާހަގަކުރައްވައި ނާޒިމް ވިދާޅުވީ ރާއްޖޭގައި ތިބެންޖެހޭނީ 73 މެންބަރުންނާއި 80 އާ ދެމެދު އަދަދަކަށް ކަމަށް ދެކެވަޑައިގަންނަވާ ކަމަށެވެ.
އޭނާ ވިދާޅުވީ ގާނޫނުއަސާސީއަށް ގެންނަ އިސްލާހަކުން މި ކަންތައްތައް ހައްލުކުރެވެން އެބައޮތް ކަމަށެވެ. އެގޮތުން، 5،000 ރައްޔިތުން، 10،000 އަށް ބަދަލުކޮށްފިނަމަ މަޖިލީހުގައި ގޮނޑީގެ އަދަދު 71 ގައި ހިފެހެއްޓި، ކުރިއަށް އޮތް 25 އަހަރު ތެރޭގައި އެ އަދަދު 70 ގެ ތެރޭގައި ހިފެހެއްޓޭނެ ކަމަށް ނާޒިމް ވިދާޅުވި އެވެ.
"ފަތަންވެގެން އެރިގެން މި އުޅެނީ އަޅުގަނޑުމެން އިސްކޮޅު ނުކާ ހިސާބަށް. އަޅުގަނޑުމެންގެ ހަމަ އިސްކޮޅު އެނގިގެން އެ ހިސާބުގައި އަޅުގަނޑުމެންގެ ކަންކަން އެބަޖެހޭ ބަހައްޓަންކުރަން. އަޅުގަނޑު މި މަޖިލީހަށް ގޮވާލަން، މި ތާރީޚީ ޑެސިޝަން ނަގައި ބަޔަކީ އަޅުގަނޑުމެންނަށް ވާން އެބަޖެހޭ،"
ނާޒިމްގެ އިތުރުން އިއްޔެ މަޖިލީހުގައި ވާހަކަ ދެއްކެވި ހުރިހާ މެމްބަރުންވެސް ވަނީ މެމްބަރުންގެ އަދަދު ހިފެހެއްޓުމަށް ގާނޫނު އިސްލާހު ކުރުމަށް ތާއީދު ކުރައްވައިފަ އެވެ. ގިނަ މެމްބަރުންގެ ވިސްނުންފުޅު ހުރީ 80 އަށްވުރެއް އިތުރު ނުވާނެހެން މެމްބަރުންގެ އަދަދު ހިފަހައްޓާށެވެ.
މިހާރު ރައްޔިތުންގެ މަޖިލީހުގައި ތިއްބަވަނީ 93 މެމްބަރުންނެވެ. މިއީ މިދިޔަ 19 ވަނަ މަޖިލީހާ އަޅާ ބަލާއިރު 8 މެމްބަރުންގެ އިތުރުވުމެކެވެ.
Ads by STO
