ހެޔޮ ވިސްނައިދިނުމުގައި މުޖުތަމައުވަނީ އިހުމާލުވެފައި: ރައީސް
މީހުންނަށް ހެޔޮ ވިސްނައިދިނުމުގައި މުޖްތަމައުވަނީ އިހުމާލުވެފައި ކަމަށް ރައީސް ޑރ މުހައްމަދު މުއިއްޒު މިރޭ ވިދާޅުވެއްޖެ އެވެ.
ރައީސް އެހެން ވިދާޅުވީ ހިޖުރީ އާ އަހަރު ފެށުމުގެ މުނާސަބަތުގައި ފޮނުއްވި ހިތޯބުގަ އެވެ. ރައީސް ވިދާޅުވީ ހިޖުރީ އާ އަހަރެއްގައި، ރައްޔިތުން އެއްބައިވަންތަވެ، މިއަދު އައު ކުރަންވީ އެއް އަޒުމަކީ، ގައުމުގެ ކަންކަން އިސްލާހުކުރުމުގައި އެންމެން އެކަތިގަނޑަކަށްވުން ކަމަށެވެ.
އެމަނިކުފާނު ވިދާޅުވީ ވޭތުވެ މިދިޔަ އެތައް އަހަރަކު އަޅައިނުލެވި ދޫކޮށްލާފައި ހުރުމުގެ ސަބަބުން، ރާއްޖޭގެ ގާނޫނުތަކާ ހިލާފަށް އެތައް ބިދޭސީއަކު ދިރިއުޅެމުންދާ ކަމަށެވެ.
"މަސްތުވާތަކެއްޗާއި، ގޭންގު ކުށްތައް ފަދަ ކަންކަން ހުއްޓުވައި، މީހުންނަށް ހެޔޮ ވިސްނައިދިނުމުގައި މުޖްތަމައުވަނީ އިހުމާލުވެފައެވެ. ލިބޭ އެއްޗަކުން ދެކޮޅު ޖެއްސުމާއި ހަރަދުބަރަދު ކުޑަކުރުން ފަދަ އާދަތަކަށް އަޅުގަނޑުމެން އަހުލުވެރިވުން ކުޑައެވެ" ރައީސް މުއިއްޒު ވިދާޅުވި އެވެ.
އެމަނިކުފާނު ވިދާޅުވީ މާނަވީ ގޮތުން ބަލާއިރު، ހިޖުރަކުރުމުގެ މާނައަކީވެސް އިންސާނާ ހުރި ހާލަތުން، އެއަށްވުރެ ރަނގަޅު ހެޔޮ ގޮތްތަކަކަށް ރުޖޫއަވުން ކަމަށެވެ.
"އައު އަހަރާއެކު އަޅުގަނޑުމެންގެ އަޒްމަކަށް ވާންވީ، ރާއްޖޭގެ މާދަމާގެ ސަލާމަތާއި، ފުދުންތެރިކަމާއި، ތަމައްދުނަށްޓަކައި ސަރުކާރުން ފަށާފައިވާ އިސްލާހީ އަދި ބިނާކުރަނިވި މަސައްކަތްތަކަށް އެއްބާރުލުން ދެއްވުމެވެ. އެންމެން އެއް ރޫހެއްގައި މި ގައުމުގެ ކުރިމަގަށްޓަކައި މަސައްކަތް ފެށުމެވެ" ރައީސް ވިދާޅުވި އެވެ.
ރައީސް ވިދާޅުވީ މަދީނާގައި ކީރިތި ރަސޫލާ صلى الله عليه وسلم ހޭދަކުރެއްވި ދުވަސްތަކުން ފެންނާން އޮތީ، މުސްލިމުންގެ މެދުގައި ގުޅުން ބަދަހިކޮށް އަހްވަންތަކަން ވަރުގަދަ ކުރެއްވުމަށް އެކަލޭގެފާނު އިސްކަން ދެއްވިކަން ކަމަށެވެ.
އަވަށްޓެރީންގެ ގޮތުގައި ތިބި އެކި ދީންތަކާއި، އެކި ފިކުރުތަކުގެ އަހުލުވެރީންނާއެކު ސުލްހަ ގާއިމުކުރެއްވި ކަމަށާއި މަދީނާގެ ބާޒާރުތަކަކީ ވިޔަފާރީގެ މަގްބޫލް މަރުކަޒުތަކަކަށް ހެއްދެވި ކަމަށް ވިދާޅުވި އެވެ
."ފެހިކަމާއި ދިރުން އިސްސާސް ކުރެވޭ ވަޒަނެއްގެ ގޮތުގައި މަދީނާ އާބާދުކުރެއްވިއެވެ. ތައުލީމީ ނިޒާމެއް ޤާއިމްކުރެއްވިއެވެ. ބޭސްފަރުވާއާއި އެނޫން އިޖްތިމާއީ ހިދުމަތްތަކަށް ފަހި، މެހްމާނުންނަށް ކަމޭ ހިތުމުގައި މަޤްބޫލު ރަށަކަށް މަދީނާ ހެއްދެވިއެވެ" ރައީސް މުއިއްޒު ވިދާޅުވި އެވެ.
މި މުޖުތަމައު އަށް ހެޔޮވިސްނައިދޭނެ މީހަކު ޒަމާންތަކަށްފަހު ލިބުނުކަން އެއީ މުޅި ދިވެހި މުޖުތަމައު ކޮންމެސް މީހަކަށް ޝުކުރު އަދާކުރަން ޖެހޭނެ ކަމަކަށް ވާނެތާ.