އިސްލާމީ ގައުމުތަކުގެ ވެރިންނަށް ރައީސް ތަހުނިޔާ ފޮނުއްވައިފި
މިއަދު ފެށުނު ހިޖުރީ އައު އަހަރުގެ ތަހުނިޔާ ރައީސް ޑރ. މުހައްމަދު މުއިއްޒު، އިސްލާމީ ގައުމުތަކުގެ ވެރިންނަށް ފޮނުއްވައިފި އެވެ.
ރައީސް އޮފީހުން ބުނީ އިސްލާމީ ޤައުމުތަކުގެ އިސްވެރިންނަށް ވަކިވަކިން ރައީސުލްޖުމްހޫރިއްޔާ ފޮނުއްވި މެސެޖުގައި، މި އައު އަހަރަކީ ދުނިޔޭގެ އެކި ކަންކޮޅުތަކުގައި ތިބި އިސްލާމީ އަޚުންނާއި އުޚުތުންނަށް އުފާވެރިކަމާއި، ހަމަޖެހުމާއި، އެއްބައިވަންތަކަން ގެނެސްދެއްވުމަށާއި، ޚާއްޞަގޮތެއްގައި ހާލުގައި ޖެހިފައިވާ ފަރާތްތަކަށް މާތްاللهގެ ރަޙްމަތާއި ބަރަކާތް ލެއްވުން އެދި އެމަނިކުފާނު ދުޢާ ދަންނަވާފައި ވާކަމަށެވެ.
ރައީސުލްޖުމްހޫރިއްޔާ ފޮނުއްވި މެސެޖުގައި، މާތްالله، އިސްލާމީ އުންމަތުގެ ޞުލްޙަ މަސަލަސްކަމާއި އެއްބައިވަންތަކަމާއި އުފާ ފާގަތިކަމަށްޓަކައި ޤައުމުތަކުގެ ގުޅުން ވަރުގަދަކުރެއްވުން އެދި ދުޢާ ދަންނަވާފައި ވާކަމަށް ރައީސް އޮފީހުން ބުންޏެވެ.
މިއަދަކީ ހިޖުރީ ގޮތުން 1446 ވަނަ އަހަރުގެ މުހައްރަމް މަހުގެ އެއް ވަނަ ދުވަހެވެ. މިއަދުގެ މުނާސަބަތުގައި ރާއްޖޭގެ ސަރުކާރު އޮފީސްތަކާއި ސްކޫލުތައް ވަނީ ރަސްމީކޮށް ބަންދުކޮށްފަ އެވެ.
