ސިވިލް ސާވިސް ކޮމިޝަންގެ ރައީސް އަކަށް ނާސިހު، ނައިބުރައީސް އަކަށް ރަޝީދު
ސިވިލް ސާވިސް ކޮމިޝަން (ސީއެސްސީ) އަށް ދާދި ފަހުން އައްޔަން ކުރެއްވި ބޭފުޅުންގެ ތެރެއިން އެ ކޮމިޝަންގެ ރައީސަކަށް މުހައްމަދު ނާސިހް އަދި ނައިބު ރައީސަކަށް އިބްރާހިމް ރަޝީދު ކަނޑައެޅުމަށް ރައްޔިތުންގެ މަޖިލީހުން ފާސްކޮށްފިއެވެ.
ސިވިލް ސާވިސްގެ ގާނޫނުގައިވާ ގޮތުން އެކޮމިޝަންއަށް ކުރިމަތިލާން ހުޅުވާލުމާއި، ކުރިމަތިލާފައިވާ ފަރާތްތަކުގެ އިންޓަރވިއުކޮށް ރުހުން ދިނުމާއި، އަދި މިދެ މަގާމަށް ބޭފުޅަކު އައްޔަން ކުރުމުގެ ބާރު އޮންނާނީ ރައްޔިތުންގެ މަޖިލީހަށެވެ.
ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) ވަނީ މަޖިލީހުގެ މިއަދުގެ ޖަލްސާގައި ސީއެސްސީގެ ރައީސްއަކަށް ނާސިހް ހަމަޖެއްސުމަށާއި، ނައިބުރައީސްއަކަށް ރަޝީދު ހަމަޖެއްސުމަށް ހުށަހަޅުއްވާފައެވެ.
މަޖިލީހުހެ 68 މެންބަރުންގެ ވޯޓާއި އެކު ސީއެސްގެ ރައީސް އަކަށް ނާސިހު ހަމަޖައްސައި، 68 މެންބަރުންގެ ވޯޓާއިއެކު ސީއެސްގެ ނައިބު ރައީސް އަކަށް ރަޝީދު ވަނީ ހަމަޖެހިފައެވެ. މި ދެބޭފުޅުންނަށް ވެސް ފާސްކުރަން ނުފެންނަ ކަމުގެ ވޯޓެއް ލިބިފައެއް ނުބެއެވެ.
ސީއެސްސީގެ ރައީސްއަކަށް މަޖިލީހުން ފާސްކުރި ނާސިހަކީ ހިންގުމުގެ ދާއިރާގެ 28 އަހަރުގެ ތަޖުރިބާ ހުރި ބޭފުޅެކެވެ. އަދި ނައިބު ރައީސްއަކަށް މަޖިލިހުން ފާސްކުރި ރަޝީދަކީ، ހިންގުމުގެ ދާއިރާގެ 10 އަހަރުގެ ތަޖުރިބާ ހުރި ބޭފުޅެކެވެ.
