ފްރޮންޓްލައިން މަސައްކަތްތެރިންގެ ތެރެއިން 868 މީހުން ވަނީ ކޮވިޑަށް ފައްސިވެފައި
ފްރަންޓްލައިން މަސައްކަތްތެރިން ކޮވިޑް19 އަށް ފައްސިވާ މިންވަރު އިތުރުވަމުން އަންނަ ކަމަށާއި މިހާތަނަށް 868 ފްރޮންޓްލައިން ހިދުމަތްތެރިން ފައްސިވެފައިވާ ކަމުގައި އެޗްޕީއޭއިން ހާމަކޮށްފިއެވެ.
ހެލްތު އިމަރޖަންސީ އޮޕަރޭޝަން ސެންޓަރު (އެޗްއީއޯސީ) މިރޭ އެ ސެންޓަރުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. އިބްރާހިމް އަފްޒަލް ވިދާޅުވީ މިހާތަނަށް އެންމެ ގިނައިން ކޮވިޑަށް ފައްސިވެފައިވަނީ އެއްވެސް ވަޒީފާއެއްގައި ނޫޅޭ މީހުން ކަމަށެވެ.
އެގޮތުން ވަޒީފާ އަށް ނުދާ މީހުންގެ ތެރެއިން 933 މީހުން ހިމެނޭއިރު، އޭގެތެރޭގައި އެންމެ ގިނައިން ހިމެނެނީ އުމުރުން 30 އަހަރާއި 45 އަހަރުގެ މީހުންނެވެ. ދެން އެންމެ ގިނައިން ފައްސިވެފައިވަނީ ވަނީ 45 އަހަރާއި 60 އަހަރުގެ މީހުންނެވެ.
ފްރަންޓްލައިންގައި މަސައްކަތް ކުރާ މީހުންގެ ތެރެއިން ޖުމްލަ 868 މީހަކު ފައްސިވެފައިވާއިރު، ލޭބަރުންގެ ތެރެއިން 526 މީހަކު ވަނީ ފައްސިވެފައެވެ. އަދި ސުކޫލް ކޮލެޖްތަކުގައި ކިޔަވާ އުމުރުގެ 613 މީހަކު ވެސް ވަނީ ފައްސިވެފައެވެ.
މީގެ އިތުރުން ފަހަކަށް އައިސް އެހެން ބަލިތަކަށް ބޭސްކުރަމުންދާ މީހުން އިތުރުވެފައިވާކަން ފާހަގަކުރައްވައި އަފްޒަލް ވިދާޅުވީ ވިދާޅުވީ ހިތުގެ ބަލިތަކާއި ލޭ ނާރުގެ ބަލިތަކަށް ފަރުވާ ކުރާ މީހުންގެ ތެރެއިން 112 މީހަކު ކޮވިޑަށް ފައްސިވެފައިވާ ކަމަށެވެ. އަދި ހަކުރު ބަލީގެ 86 މީހަކާއި ގައިންގަޔަށް ނާރާ ބަލިތަކަށް ފަރުވާ ހޯދަމުންދާ 93 މީހެއްގެ އިތުރުން 41 މާބަނޑު މީހުނަށް ވެސް ވަނީ ބަލި ޖެހިފައެވެ.
