މާލީ ގޮތުން ބީއެމްއެލް ވަރުގަދަ: އެމްއެމްއޭ
ބީއެމްއެލްގެ ކާޑުގެ ޕޭމަންޓްސް މެނޭޖްކުރުމުގައި ގޮންޖެހުންތަކެއް ހުރިނަމަވެސް މާލީ ގޮތުން ބޭންކް އޮތީ ވަރަށް ރަނގަޅު ހާލަތެއްގައިކަމުގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބުނެފިއެވެ.
ރާއްޖެއަށް ކުރިމަތިވެފައިވާ ޑޮލަރުގެ ތާށިކަން އިންތިހާއަށް މަތިވެ، ބީއެމްއެލްއަށް ކުރިމަތިވެފައިވާ ޑޮލަރުގެ ތާށިކަމަށް ހައްލު ހޯދުމަށް ބޭނުންކުން ކުރެވޭ ޑޮލަރުގެ މުއާމަލާތައްކަށް ހިފެހެއްޓުންތަކެއް ގެނައުމަށްފަހު ހަމަ މިއަދު ބޭންކުން އެނިންމުން ބަދަލުކޮށްފައި ވަނިކޮށް އެމްއެމްއޭއިން ނެރުނު ބަޔާނެއްގައި ބުނެފައިވަނީ، މި ބަދަލު މުރާޖާ ކުރުމަށް އެއޮތޯރިޓީން ބީއެމްއެލްއަށް އިރުޝާދުދީފައި ވާނެ ކަމުގައެވެ. އަދި ބީއެމްއެލްގެ ކާޑުގެ ޕޭމަންޓްސް މެނޭޖްކުރުމުގައި ގޮންޖެހުންތަކެއް ހުރިނަމަވެސް މާލީ ގޮތުން ބޭންކް އޮތީ ވަރަށް ރަނގަޅު ހާލަތެއްގައިކަންވެސް އެމްއެމްއޭއިން ފާހަގަ ކޮށްފައި ވެއެވެ.
އެމްއެމްއޭއިން އިތުރަށް ބުނެފައިވަނީ، މި މައްސަލައާ ގުޅިގެން އެމްއެމްއޭ އިން ބީއެމްއެލްއާއެކު އެކި ފަހަރު މަތިން ބައްދަލުކޮށް މަޝްވަރާކޮށްފައިވާކަމަށާއި، ކޮވިޑް-19 އާ ގުޅިގެން އެޅުނު ފިޔަވަޅުތަކުގެ ސަބަބުން ބޭންކިންގ ނިޒާމުގައި ރުފިޔާ ސަރޕްލަސް ލިކުއިޑިޓީ އިތުރުވެފައިވާ ކަމަށެވެ. އެގޮތުން ފާއިތުވި ޖުލައި މަހު ނިމުނުއިރު ބޭންކިންގ ނިޒާމުގައި އެވްރެޖްކޮށް 6.7 ބިލިއަން ރުފިޔާގެ ސަރޕްލަސް ލިކުއިޑިޓީ ހުރި ކަމަށް ބުނެފައިވެއެވެ. މީގެ ބޮޑު ބައެއް ހިއްސާކުރަނީ ބީއެމްއެލް އިންނެވެ.
އެމްއެމްއޭ އިން އިތުރަށް ހާމަކުރި ގޮތުގައި ބޭންކުތަކަށް ޑޮލަރު ދޫކުރާ މިންވަރު އަހަރުން އަހަރަށް އިތުރުކޮށްފައިވެއެވެ. 2022 ވަނަ އަހަރު 267 މިލިއަން ޑޮލަރު ވިއްކާފައިވާއިރު، 2023 ވަނަ އަހަރު މި އަދަދު 307 މިލިއަނަށް އިތުރުވެފައިވެއެވެ. މި އަހަރުވެސް މި އަދަދު އިތުރުކޮށްފައިވާ ކަމަށް ބުނެފައިވެއެވެ.
އެމްއެމްއޭ އިން ބުނީ ކުރިއަށް އޮތްތަނުގައި ބޭންކުތަކަށް ދޫކުރާ ޑޮލަރުގެ ނިސްބަތް ކަނޑައެޅުމުގައި ރައްޔިތުންނާ ގުޅުންހުރި ކަންކަމަށް ރިޢާޔަތްކުރާ ބޭންކުތަކަށް އިސްކަންދޭނެ ކަމަށެވެ. އަދި ފައިނޭންޝަލް ސެކްޓަރަށް ދިމާވެފައިވާ ނިޒާމީ މައްސަލަތަކަށް ޒަމާނީ ހައްލުތައް ހޯދުމުގެ މަސައްކަތް ކުރަމުންދާ ކަމަށާއި، މި ބަދަލުތަކުން ރާއްޖޭގައި ފޮރިން ޑައިރެކްޓް އިންވެސްޓްމަންޓަށް ފަހި މާހައުލެއް އުފެދިގެންދާނެ ކަމަށް އެމްއެމްއޭ އިން އުންމީދުކުރާ ކަމަށް ބުނެފައިވެއެވެ.
