ރައީސް ވަހީދު 1000 ރުފިޔާއިން ޖޫރިމަނާ ކޮށްފި
އިދިކޮޅު ކޯލިޝަނުން ބޭއްވި ސައިކަލު ބުރާއި ގުޅިގެން މިއަދު ފުލުހަށް ހާޒިރު ކުރުމަށްފަހު ކުރީގެ ރައީސް ޑރ.މުހައްމަދު ވަހީދު ހަސަން މަނިކު 1000ރުފިޔާ އިން ޖޫރިމަނާ ކޮށްފިއެވެ.
ޕީޕީއެމް/ޕީއެންސީ ކޯލިޝަނުގެ ސްޕެޝަލް އެޑްވައިޒާކަން ވެސް ކުރައްވަމުން ގެންދަވާ ޑރ. ވަހީދު ފުލުހަށް ހާޒިރުވުމަށްފަހު ނޫސްވެރިންނާއި ބައްދަލު ކުރައްވައި ވާހަކަދައްކަވަމުން ވިދާޅުވީ އެމަނިކުފާނު ފުލުހަށް ހާޒިރު ކުރެއްވީ އާންމު ސިއްހަތުގެ އުސޫލާއި ހިލާފަށް މާސްކު ނާޅުއްވައި ހުންނެވި ކަމަށް ތުހުމަތުކޮށް ކަމަށެވެ.
އަދި މިއީ ސިޔާސީ ކަމެއް ކަމަށާއި މިކަން ބޮޑު ކަމަކަށް ހަދާފައިވަނީ ވެސް އެ ސަބަބަށްޓަކައި ކަމުގައި ރައީސް ވަހީދު ވިދާޅުވިއެވެ.
"އެހެން ނޫނީ މަގުމަތީގައި މާސްކު ނާޅާ އުޅޭ މީހުންގެ ފޮޓޯ ނަންގަވާފައި ފުލުސް އޮފީހަށް ފޮނުވިޔަސް ހީއެއް ނުވޭ ހުރިހާ އެންމެން ގެންދާނެ ހެނެއް. އެހެންވީމަ ދެންނެވެން އޮތީ ސިޔާސީ ކަމެކޭ މިއީ" ވަހީދު ވިދާޅުވިއެވެ.
އިދިކޮޅުން މިދިޔަ މަހުގެ 28 ވަނަ ދުވަހު ބޭއްވި ސައިކަލު ބުރު ނިންމާލުމަށްފަހު ވަހީދު ވަނީ އެއްވެފައި ތިބި މީހުންނާއި މުހާތަބު ކުރައްވައި މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.
އެކަމާއި ގުޅިގެން މީގެ ކުރިން ޕީއެންސީގެ ރައީސް އަދި ފޮނަދޫ ދާއިރާގެ ކުރީގެ މެންބަރު އަބްދުއްރަހީމް އަބްދުﷲ އާއި ނައިފަރު ދާއިރާގެ މެންބަރު އަހްމަދު ޝިޔާމްގެ އިތުރުން ޕީއެންސީގެ ނައިބު ރައީސް އިބްރާހިމް ޝުޖާއު ވަނީ ފުލުސް އޮފީހަށް ހާޒިރުކޮށް ޖޫރިމަނާ ކޮށްފަ އެވެ.
