ދުވުންތެރިއެއްގެ މަރާ ގުޅިގެން ވެސް މެރަތަން ކެންސަލް ނުކުރުމުން ޓީއެފްޖީއަށް ކިނލަބުކަން
ރާއްޖޭގެ ފިޓްނަސް ދާއިރާގައި އެންމެ ނަން ހިނގާ އެއް ފިޓްނަސް ސެންޓަރު، ޓީއެފްޖީން އިންތިޒާމުކުރި "އެމްއައިބީ ބޮޑު 5 ބައި ޓީއެފްޖީ" މެރަތަންގެ ބައިވެރިއަކު މަރުވުމާ އެކު ވެސް މެރަތަން މެދުކަނޑާނުލައި ކުރިއަށް ގެންދިއުމުން ގިނަ ބައެއްގެ ފާޑުކިޔުން އެކަމަށް އަމާޒުވެއްޖެ އެވެ.
ރޭ މެންދަމު 2:30 ހާއިރު، ސެންޓްރަލް ޕާކު ކައިރިން ހިނގި އެކްސިޑެންޓުގައި މަރުވީ ލ. އިސްދޫއަށް ނިސްބަތްވާ ހަސަން ސަމާހެވެ. އޭނާ އެންމެފަހުން އުޅުނީ ތިން ވަގުތަކަށް ބަހާލައިގެން އެ ޕާކުގައި މެންދަމު 03:10 ގައި ފެށުމަށް ތައްޔާރުވަމުންދިޔަ މެރަތަންގައި ބައިވެރިވާ މީހުން އެ ސަރަހައްދަށް ގެންގޮސްދިނުމުގަ އެވެ.
"ހުޅުމާލެ ސެންޓްރަލް ޕާކުގެ މާހައުލު މި ގަޑީގައި (މިއަދު ހެނދުނު 6.45 ގައި) މި އޮތީ ވަރަށް އުފާވެރި "ފެސްޓިވް" ކޮށެވެ. ކޮންމެވެސް މެރެތަނެއްގައި ދުވާ ދުވަހެކެވެ. ބެރެއްގެ އަޑުން މުޅި ހިސާބުގަނޑު އޮތީ ގުުގުމާލާފަ އެވެ. ބާރަށް ދުވުމަށް ބާރުއަޅައި އަންހެން ބޭފުޅަކު ލައުޑު ސްޕީކަރުގެ ބޭނުންކޮށްގެން ހަޅޭއްލަވަ އެވެ،"
ސަމާހުގެ މަރާ އެކު ވެސް މެރަތަން ހިނގަމުން ދިޔަކަން ފާހަގަކޮށް، މަަޝްހޫރު އީއެންޓީ ސާޖަން ޑރ. މައުރޫފް ހުސައިން މިއަދު ހެނދުނު ފޭސްބުކްގައި ލިޔުއްވާފައިވެ އެވެ. ސެންޓްރަލް ޕާކުގެ ވަށައިގެން އޮންނަ ވަށް މަގު އުރީދޫ އޮފީސް އިމާރާތް ކުރިމައްޗާއި އެ ހިސާބުގަނޑުގެ މަގުގެ ބޮޑު ބައެއް ވަނީ ފުލުހުން ބަންދުކޮށްފައި ކަން ފާހަގަކުރައްވާ އެވަގުތު ފެނިވަޑައިގެންނެވި މަންޒަރު ސިފަކޮށްދެއްވި އެވެ.
"އެތާގައި އެކި ހިސާބުތަކުގައި ފުލުހުން ފާހަގަ ޖަހާފައިވެ އެވެ. ފުނޑުފުނޑުވެފައި އޮތް ސައިކަލެކެވެ. ހަލާކުވެފައި އޮތް އައިނެއް ވެސް އެއް ފާހަގަ ކައިރީގައި އޮތެވެ. ސައިކަލުގެ އެކި ބައިތައް ދުރު ހިސާބުތަކުގައި ހުއްޓެވެ. މަގުމަތީގައި ވަރަށް ގިނަ ލޭތަކެއް ހުއްޓެވެ. ތަންކޮޅެއް ދުރުގައި އެ އޮތީ ރޭސް ކާރެކެވެ،"
މަގުމަތީގައި ހުރި ފުލުހެއް ކައިރިން ވެގެން އުޅޭ ގޮތް އަހާލުމުން މެރަތަންގައި ދުވުމަށް އެތަނަށް އައި ޒުވާނަކު އެ މަގަށް ލަނބާލި ތަނާ ބާރު ސްޕީޑުގައި ދުއްވާފައި އައި ރޭސް ކާރެއްގައި ޖެހުނީ ކަމަށް ވިދާޅުވި ކަމަށެވެ.
މެރަތަން ދުވަން މާލެ އައި 23 އަހަރުގެ ޒުވާނާ އެކްސިޑެންޓުވިއިރު، އޭނާ ދުއްވި ސްކޫޕީ ސައިކަލުގެ ފަހަތުގައި އިތުރު މީހަކު ވެސް އިނެވެ. ކޮންމެވެސް ވަރެއްގެ ހާނީއްކަތަކެއް އެ މީހާއަށް ވެސް ވި އެވެ.
އެކްސިޑެންޓުގައި ސަމާހަށް ސީރިއަސް އަނިޔާތަކެއް ލިބުނެވެ. އެގޮތުން އޭނާގެ ބޮލަށާއި މޫނަށް އަނިޔާވިއިރު، ގިނަ އަދަދަކަށް ލޭ ވެސް ހަށިގަނޑުން ބޭރުވެފައިވާ ކަމަށް މައުލޫމާތު ލިބެ އެވެ.
އެ އެކްސިޑެންޓް ހިނގުމާ އެކު ސަމާހަށް ފަރުވާ ދިނުމަށް ހުޅުމާލެ ހޮސްޕިޓަލަށް ގެންދިޔައީ މަގުމަތިން ޕިކަޕެއް ހުއްޓުވައި އެއަށް އަރުވައިގެންނެވެ. ހޮސްޕިޓަލާ ހަވާލާދީ ފުލުހުން ބުނެފައި ވަނީ އޭނާ މަރުވެފައި ވަނީ ހޮސްޕިޓަލުގައި ފަރުވާ ދެމުން ދަނިކޮށް ކަމަށެވެ.
މައުރޫފުގެ ޕޯސްޓުގައި އިތުރަށް ވިދާޅުވީ މިފަދަ ހިތާމަވެރި ހާދިސާއެއް ހިނގުމުން ވެސް އެ ސަރަހައްދުގައި މާހައުލު ގާއިމުކޮށް، ހަޅޭއްލަވައި ބެރުޖަހަމުން ޕްރޮގްރާމް ކުރިއަށް ގެންދަނީ ކީއްވެގެންތޯ ސުވާލު ކުރެވުނު ކަމަށެވެ.
"ފުރާނަޔަކީ މިއަދު އަޅުގަނޑުމެން ދިވެހިންގެ ތެރޭގައި އެއްވެސް އަގެއް ހުރި އެއްޗެއް ނޫނެއް ނޫންތޯ؟"
އޭނާ ކުރެއްވި ސުވާލަށް ފުލުުސް ދެއްވި ޖަވާބާ ގުޅިގެން މައުރޫފު ވެސް ދެން އުފެއްދެވީ ސުވާލުތަކެކެވެ. "މެރަތަންގައި ދުވުމަށް އައި މީހުން ކައިރީގައި މި ހާދިސާގެ ހިތާމައިގައި ޕްރޮގްރާމް ކެންސަލް ކޮށްފީމޭ ނުބުނެވޭނެ ބާވަ އެވެ؟ އިންސާނީ ކަރާމަތާއި ލޭގެ އަގެއް ނެތީ ހެއްޔެވެ؟"
މައުރޫފެކޭ އެއްފަދައިން ސަމާހުގެ މަރާ އެކު، ޓީއެފްޖީން މީގެ އަށް ގަޑިއިރެއްހާ ކުރިން ކުރި ޕޯސްޓަށް މީހުންގެ ފާޑުކިޔުން އަމާޒުވި އެވެ. އެކަމާ ގުޅިގެން ކޮމެންޓް ނުކުރެވޭ ގޮތް ހެދުމުން ޕޯސްޓް ޝެއާކޮށް ގިނަ ބަޔަކު ދަނީ ފާޑުކިޔަމުންނެވެ.
ކޮމެންޓްކުރި އެކަކު ބުނި ގޮތުގައި މިއީ މެރަތަން މެދުކަނޑާލާނެ ހާލަތެއް ކަމުގަ އެވެ. އެހެންނަމަވެސް މިވަރުގެ ބޮޑު ކަމެއް ދިމާވީމާ އެކަން ކުރަން ނުކެރުނު ކަމުގަ އެވެ. އެހެން މީހަކު ބުނެފައި ވަނީ ކޮމެންޓް ނުކުރެވޭ ގޮތް ހެދީ ގަޓް ނެތީމާ ކަމަށެވެ. ގިނަ ކޮމެންޓު ތަކުގައި ވަނީ މެރަތަން މެދުކަނޑާނުލައި އަދި ކުރިއަށް ގެންދިޔަ ގޮތާ މެދު ފާޑުކިޔާފަ އެވެ.
އެކަމާ ގުޅިގެން ހަބަރު ޕަބްލިޝް ކުރުމާ ހަމައަށް ޓީއެފްޖީގެ ބަހެއް ހޯދުމަށް މަސައްކަތް ކުރި ނަމަވެސް އެކަން ވާގޮތް ވަނީ ނުވެފަ އެވެ.
އެކްސިޑެންޓާ ގުޅިގެން ރޭސް ކާރު ދުއްވި މީހާ ހައްޔަރުކޮށް، އޭނާގެ ވަނަވަރު ފުލުުހުން ވަނީ ހާމަކޮށްފަ އެވެ. އެ ކާރު ދުއްވަން އިނީ އައްޑޫ ސިޓީ ހިތަދޫ، ވައިލެޓްފެހި، އުމުރުން 26 އަހަރުގެ މުހައްމަދު ވިސާމު ސިއްދީގެވެ. އޭނާ މިވަގުތު ހުރީ ފުލުހުންގެ ހައްޔަރުގަ އެވެ.
