ޖޭއެސްސީގެ މެންބަރުކަމުގެ މަޤާމަށް ރައީސް ބޭފުޅަކު އައްޔަން ކުރައްވައިފި
ޖުޑީޝަލް ސާރވިސް ކޮމިޝަން (ޖޭ.އެސް.ސީ)ގެ މެންބަރު ކަމުގެ މަގާމަށް މ.ފަލްކަންގެ، މުހައްމަދު ނާޞިޙް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް މިއަދު އައްޔަން ކުރައްވައިފިއެވެ.
އެ މަގާމަށް މުހައްމަދު ނާޞިޙް އައްޔަން ކުރެއްވީ ދިވެހި ޖުމްހޫރިއްޔާގެ ގާނޫނުއަސާސީގެ 158 ވަނަ މާއްދާގެ (ކ) އާއި، ޖުޑީޝަލް ސާރވިސް ކޮމިޝަންގެ ގާނޫނުގެ 3 ވަނަ މާއްދާގެ 7 ވަނަ ނަންބަރުގައި ބަޔާންކޮށްފައިވާ ގޮތުގެ މަތިން، ސިވިލް ސާރވިސް ކޮމިޝަނުގެ ރައީސްގެ ހައިސިއްޔަތުންނެވެ.
ޖުޑީޝަން ސަރވިސް ކޮމިޝަނުގެ މެންބަރުކަމަށް މުހައްމަދު ނާޞިޙު އައްޔަންކުރެއްވުމުގެ ކުރިން، އެ ކޮމިޝަނުގެ މެންބަރުކަމުގެ ހުވާ، އެމަނިކުފާނު ރައީސްގެ ކުރިފުޅުމަތީގައި ކުރެއްވިއެވެ. މިކަމަށްޓަކައި މިއަދު ރައީސުލްޖުމްހޫރިއްޔާގެ އޮފީހުގައި ބޭއްވުނު ރަސްމިއްޔާތުގައި އެ މަނިކުފާނަށް ހުވައި ލައިދެއްވީ އުއްތަަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް އަދުނާން އެވެ.
ރައީސް އިބްރާހިމް މުހައްމަދު ޞާލިހް ،މިއަދު ވަނީ ސްޕްރީމް ކޯޓުގެ ފަނޑިޔާރުކަމުގެ މަގާމަށް ވެސް ދެބޭފުޅަކު އައްޔަން ކުރައްވާފައެވެ.
Ads by STO
