ކުންފުނިތަކުގެ ގާނޫނަށް ގެނައި އިސްލާހުގެ ބިލު ތަސްދީގުކޮށްފި
ކުންފުނިތަކުގެ ގާނޫނަށް ގެނައި އިސްލާހުގެ ބިލު ރައީސް ޑރ. މުހައްމަދު މުއިއްޒު ތަސްދީގުކުރައްވައިފި އެވެ.
ސަރުކާރުގެ ފަރާތުން ހުށަހެޅި ބިލު ރައްޔިތުންގެ މަޖިލީހުން ފާސްކުރީ އިއްޔެ އެވެ. އަދި މިއަދު ވަނީ އެ ބިލު ސަރުކާރުގެ ގެޒެޓުގައި ޝާއިއުކޮށް އަމަލުކުރަން ފަށައިފަ އެވެ.
އެ ބިލު ތަސްދީގުކުރުމާއެކު ކުންފުނިތަކުގެ އަހަރީ އާންމު ޖަލްސާ ބޭއްވުމަށް އެދި ލިޔުން ލިބޭތާ 21 ދުވަހުގެ ތެރޭގައި ޖަލްސާއަށް ދަޢުވަތު ދިނުމަށް ކަނޑައަޅާފައިވާ މުއްދަތު ތިން ދުވަަހަށް ކުރުވާނެ އެވެ.
އަދި ޖަލްސާ ބޭއްވުމަށް އެދި ހުށަހަޅާތާ ތިން މަސް ދުވަހުގެ ތެރޭގައި ޖަލްސާ ބާއްވަން ޖެހޭނެ ކަމުގައި ކަނޑައަޅާފައިވާ މުއްދަތު 10 ދުވަހަށް ކުރުވާނެ އެވެ.
ހަމަ އެހެންމެ ޕްރައިވެޓް ކުންފުނިތަކުން ހާއްސަ އާންމު ޖަލްސާއެއް ބޭއްވުމަށް ހަމަޖެހިފައިވާ ދުވަހުގެ މަދުވެގެން 14 ދުވަސް ކުރިން އެ ކުންފުންޏެއްގެ މެންބަރުންނަށް ނޯޓިސް ފޮނުވުމަށް ކަނޑައަޅާފައިވާ މުއްދަތު ވެސް ހަތް ދުވަހުގެ ކުރިން ފޮނުވަން ޖެހޭގޮތަށް މިހާރު ވަނީ ބަދަލުކޮށްފަ އެވެ.
އަދި ޕަބްލިކް ކުންފުނިތަކުންވެސް ހާއްސަ އާންމު ޖަލްސާއެއް ބޭއްވުމަށް ހަމަޖެހިފައިވާ ދުވަހުގެ މަދުވެގެން 14 ދުވަސް ކުރިން އެ ކުންފުންޏެއްގެ މެންބަރުންނަށް ނޯޓިސް ފޮނުވަން ކުރިން ކަނޑައަޅާފައިވާ މުއްދަތުވެސް މަދުވެގެން ހަތް ދުވަސް ކުރިން ނޯޓިސް ފޮނުވަން ޖެހޭގޮތަށް ވަނީ ބަދަލުކޮށްފަ އެވެ.
އޭގެ އިތުުރން ކޮންމެ ޕަބްލިކް ކުންފުންޏެއްގައި، މަދުވެގެން ދެ ޑިރެކްޓަރުން ތިބެންވާނެ ކަމަށާއި އަދި ކޮންމެ ސަރުކާރުގެ ކުންފުންޏަކާއި، ލޯކަލް އޮތޯރިޓީ ކުންފުންޏެއްގައި މަދުވެގެން ތިން ޑިރެކްޓަރުން ތިބެންވާނެ ކަމަށް ބަޔާންކޮށްފައިވީ ނަމަވެސް، އެހެން ގާނޫނެއްގައި ނުވަތަ ސަރުކާރުގެ ކުންފުންޏެއް އުފައްދާ ގާނޫނެއްގައި ނުވަތަ ގަރާރެއްގައި، ނުވަތަ ކުންފުނީގެ ހިންގާ ގަވާއިދުގައި، އެ ކުންފުންޏެއްގައި މަދުވެގެން ތިބެންޖެހޭ ޑިރެކްޓަރުންގެ އަދަދު އިތުރުކުރުމަށް ހުރަހެއް ނެތް ކަމަށް ވެސް އަލަށް ގެނައި އިސްލާހުގައި ބުނެފައިވެ އެވެ.
