ވޭޕް މަނާކުރުމާ ދެކޮޅު އިހުތިޖާޖެއް، ވޭޕް ވިއްކާ ފިހާރަތަކުން ވިޔަފާރި ހުއްޓާލައިފި

ވޭޕް މަނާކުރަން ނިންމި ނިންމުމާ ދެކޮޅަށް އިހުތިޖާޖު ކުރުމުގެ ގޮތުން މާލޭގައި ވޭޕްގެ ވިޔަފާރި ކުރަމުން އަންނަ ފިހާރަތަކުން ވިޔަފާރި ހުއްޓާލައިފި އެވެ.

Ads by MWSC

ވޭޕް ކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން އަންނަ މަހުގެ 15 ދުވަހުން ފެށިގެން މަނާ ކުރުމަށާއި ވޭޕް ކުރުމަށް ބޭނުން ކުރާ ތަކެތި ބޭނުން ކުރުމާއި ގެންގުޅުމާއި ވިއްކުމާއި އިޝްތިހާރު ކުރުމާ އަދި ހިލޭ ބެހުން އަންނަ ޑިސެމްބަރު މަހުގެ 15 ވަނަ ދުވަހުން ފެށިގެން މަނާ ކުރުމަށް ނިންމަވާފައިވާކަން ރައީސް ޑރ. މުހައްމަދު މުއިއްޒު ހާމަކުރައްވާފައި ވަނީ މި މަހުގެ 14 ވަނަ ދުވަހު އެވެ.

އެ ނިންމުމަށް އެއް ބަޔަކު ތާއީދުކުރިއިރު އަނެއް ބައެއްގެ ނުރުހުން ސަރުކާރަށް އަމާޒުވީ ވޭޕް މަނާކުރިއިރު ދުންފަތުގެ ބާވަތްތައް މަނާނުކުރުމުންނެވެ. އެ ވިޔަފާރީގައި ހަރަކާތްތެރިވާ ފަރާތްތަކުން ވެސް ވަނީ އެފަދަ ނިންމުމެއް ކުއްލި ގޮތަކަށް ނިންމިއިރު އެ ފަރާތްތަކުގެ މަޝްވަރާ ހޯދާފައި ނުވާތީ ހިތްހަމަނުޖެހުން ފާޅުކޮށްފަ އެވެ.

މައުލޫމާތު ލިބޭ ގޮތުން ފިހާރަތަކުން ވިޔަފާރި ހުއްޓާލާފައި ވަނީ ވޭޕް ވިއްކުން މަނާ ކުރަން ނިންމި ނިންމުމާ ގުޅިގެން މައްސަލައަށް ހައްލު ލިބެންދެން މުއްދަތެއް ނެތް ގޮތަށެވެ. ބަންދުކުރި ފިހާރަތަކުގެ ތެރޭގައި ސިލްވާ ސްމޯކް، ޕަފް ކްލަބް، ބްރޯކް އެންޑް ބިޒީ، ނެނޯސްޓިކް މޯލްޑިވްސްގެ އިތުރުން ޕޮޑް ސޯލްޓް ހިމެނެ އެވެ.

ރައީސްގެ ނިންމެވުމާ އެކު، ބަންޑާރަނައިބު އަހްމަދު އުޝާމް ވިދާޅުވެފައިވާ ގޮތުގައި ގާނޫނުތަކަށް ގެންނަން ޖެހޭ އިސްލާހުތައް ރައްޔިތުންގެ މަޖިލިހަށް ފޮނުވުމަށް ކުރަން ޖެހޭ މަސައްކަތްތައް ކުރަމުން އަންނަ ކަމުގަ އެވެ.

ދުންފަތް ކޮންޓްރޯލްކުރުމާ ބެހޭ ގާނޫނަށް އިސްލާހު ގެނައުމަށް ހުށަހަޅަން ނިންމާފައިވާ ބިލު ޑްރާފްޓުކޮށްފައި ވަނީ އީ-ސިނގިރެޓާއި ވޭޕްގެ ވިޔަފާރިކުރާ މީހުންނަށާއި އެތަކެތި އިސްތިއުމާލުކުރާ މީހުންނަށް ހަރުކަށި ފިޔަވަޅުތަކެއް އެޅޭ ފަަދަ ގޮތަކަށެވެ. އެގޮތުން އީ-ސިނގިރެޓާއި ވޭޕް ކުރަން ބޭނުންކުރާ އާލަތްތަކާއި އޭގެ ބައިތައް އަންނަ އަަހަރުގެ ޖެނުއަރީ މަހުގެ ހަތް ވަނަ ދުވަހުން ފެށިގެން ރާއްޖެ އެތެރެކުރުމަކީ މަނާ ކަމެއް ކަމުގައި ވަނީ ބަޔާންކޮށްފަ އެވެ. އަދި އެޕްރީލް ހަތް ވަނަ ދުވަހުން ފެށިގެން ރާއްޖޭގައި އުފެއްދުމާއި ވިއްކުމާއި ހިލޭ ބެހުމާއި ގެންގުޅުމާ އަދި ބޭނުން ކުރުމަކީ މަނާ ކަމެއް ކަމަށެވެ.

ސިއްހަތަށް އެތައް ގެއްލުމެއް ލިބޭ ވޭޕަކީ ޒުވާނުންގެ މެދުގައި ބޮޑު މަގުބޫލު ކަމެއް ލިބިފައިވާ އުފެއްދުމެއް ނަމަވެސް ވޭޕް އާ ދެކޮޅަށް ބޮޑު ކެމްޕެއިނެއް މި ދޭތެރެއިން ކުރިއަށް ގެންގޮސްފައިވެ އެވެ.