ޑިއުޓީ ނިންމާފައި 5 މިނެޓުން ރަށަށް ދެވޭ އެތައް ރިސޯޓެއް އޮތަސް ދާކަށް ހުއްދައެއް ނޯވޭ: ނިހާދު
ޑިއުޓީ ނިންމާލުމަށްފަހު 5 މިނެޓުން އަނބުރާ ރަށަށް ދެވޭ އެތައް ރިސޯޓެއް ވާކަމަށާއި، އެހެން ނަމަވެސް އޭގެން ރަށަކަށް ދާނެ ހުއްދައެއް ނޯންނަ ކަމަށް އައްޑޫ ފޭދޫ ދާއިރާގެ މެންބަރު މުޙައްމަދު ނިހާދު ވިދާޅުވެއްޖެ އެވެ.
ނިހާދު ކުރައްވާފައިވާ ޓުވީޓެއްގައި ވިދާޅުވެފައި ވަނީ މުވައްޒަފުން ތިބެން ޖެހެނީ ޑިއުޓީ ނިމުމަށް ފަހު ވެސް ސްޓާފް އޭރިޔާގައި ތާށިވެފައި ކަމަށާއި، އަނބިދަރިން ގާތަށް ކިތަންމެ ދާން ބޭނުންވި ކަމުގައި ވީނަމަވެސް ނުދެވޭ ކަމަށެވެ. އަދި ޑިއުޓީ ނިންމާފައި ރަށަށް ދެވޭނެ ކަމަށާއި ރިސޯޓަކީ ޖަލެއް ނޫން ކަމަށް ވެސް ނިހާދު ކުރެއްވި ޓުވީޓުގައި ލިޔުއްވާފައި ވެއެވެ.
ނިހާދު ވިދާޅުވީ އެބޭފުޅާ މިކަން ތަޖުރިބާ ކުރައްވާފައިވާ ކަމަށާއި، ކިހާދުއްފަރުން ޖެހިގެން އޮންނަ ދޮންފަނަށް ދިއުމަކީވެސް އެތަނުގައި މަނާކަމެއް ކަމަށެވެ.
ތުޅާދޫ ދާއިރާގެ މެންބަރު ހިސާން ހުސައިން މަޖިލީހަށް ހުށަހަޅުއްވާފައިވާ އިސްލާހެއް ކަމަށްވާ ރިސޯޓުތަކުގައި ވަޒީފާ އަދާކުރާ މުވައްޒަފުން ޑިއުޓީ ގަޑި ނިމުމުން ރޭގަނޑު ރަށަށްދެވޭ ގޮތް ހަދަން ފާސްކޮށް ވަޒީފާއާ ބެހޭ ގާނޫނު ވަނީ އިސްލާހުކޮށްފަ އެވެ.
މީގެ އިތުރުން ރިސޯޓު ދޫކޮށް ދިއުމަށްޓަކައި ރިސޯޓު އުޅަނދު ނޫން އެހެން އުޅަނދުތައް ބޭނުންކުރުމުގެ ފުރުސަތު ލިބޭނެ ކަމަށާއި، ވަޒީފާ އަށް އެނބުރި އަންނަން ބޭނުންކުރާ އުޅަނދު ރިސޯޓަށް ވަނުން މެނޭޖްމަންޓަށް މަނާ ނުކުރެވޭނެ ކަމަށްވެސް އެ ބިލުގައި ވަނީ ބުނެފައެވެ.
ބަލަ ޤާނޫނު އަސާސީ އަކީ ހަމައެކަނި ދޮންފަނު މީހުންގެ ޙައްޤުތައް ލިޔަން އޮންނަ އެއްޗެއްތަ؟ ޤާުނޫނެއް ވިއްޔާ ވާންޖެހޭނީ އެންމެނަށް ހަމަހަމަ އެއްޗަކަށް….. ބޯގަޅި ވިޔަސް ތަންފުކެއް ބޮޑުވަރު ތީ..