ނައިބު ރައީސް ޗޮގަމްގައި ބައިވެރިވެ ވަޑައިގަތުމަށް ކުރެއްވި ދަތުރުފުޅު ނިންމަވާލައްވައިފި
ކޮމަންވެލްތު ގައުމުތަކުގެ އިސްވެރިންގެ ބައްދަލުވުން، ކޮމަންވެލްތު ހެޑްސް އޮފް ގަވަމަންޓް މީޓިން (ޗޮގަމް 2024) ގައި ބައިވެރިވެ ވަޑައިގަތުމަށް ރައީސުލްޖުމްހޫރިއްޔާގެ ނައިބު، އަލްއުސްތާޒު ހުސައިން މުހައްމަދު ލަތީފު ސަމޯއާއަށް ކުރެއްވި ރަސްމީ ދަތުރުފުޅު މިއަދު ނިންމަވާލައްވައިފި އެވެ.
މި ދަތުރުފުޅުގައި ފޮރިން އެފެއާޒް މިނިސްޓަރު ޑރ. އަބްދުالله ހަލީލާއި ސްޕޯޓްސް، ފިޓްނަސް، އެންޑް ރިކްރިއޭޝަން މިނިސްޓަރު އަބްދުالله ރާފިއު އަދި ދިވެހިރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ހައިކޮމިޝަނަރު ޑރ އިރުތިޝާމް އާދަމް ހިމެނިވަޑައިގަންނަވާހެން ދިވެހިރާއްޖޭގެ މަތީ ފެންވަރުގެ ވަފުދެއް ނައިބު ރައީސްގެ އަރިހުގައި ޗޮގަމް 2024 ގައި ބައިވެރިވެ ވަޑައިގެންނެވި އެވެ.
ދަތުރުފުޅުގައި ނައިބު ރައީސް ވަނީ ޗޮގަމް 2024 ގެ މައިގަނޑު ބައްދަލުވުމާއި ހަވާސާ އިވެންޓްތަކުގައި ބައިވެރިވެވަޑައިގެން، ރާއްޖެއާ ގުޅުންހުރި ބައިނަލްއަގުވާމީ މުހިންމު މައްސަލަތަކާ ގުޅޭ މަތީ ފެންވަރުގެ މަޝްވަރާތަކުގައި ބައިވެރިވެވަޑައިގެން ވާހަކަފުޅު ދައްކަވާފަ އެވެ.
އެގޮތުން ޗޮގަމް ކްލައިމެޓް ބްރެކްފާސްޓް: ބިލްޑިން ކޮންސެންސަސް ފޮ ކްލައިމެޓް ފައިނޭންސް ޓާގެޓްސް އިން ދަ ކޮމަންވެލްތު، ކޮމަންވެލްތު ބިޒްނަސް ފޯރަމް: އައިލެންޑް ލީޑަސް ރައުންޑް ޓޭބަލް އަދި އެސްއެމްއައިގެ ސީއީއޯ-ލީޑަސް އިވެންޓްގައި ނައިބު ރައީސް ވަނީ ވާހަކަފުޅު ދައްކަވާފަ އެވެ.
ނައިބު ރައީސް ވަނީ ޗޮގަމް 2024 ގެ ބައްދަލުވުންތައް ކުރިއަށް ގެންދިޔަ ސަމޯއާގެ ބޮޑުވަޒީރު ފިއާމޭ ނައޯމީ މަޓައާފާގެ އަރިހަށް އިހުތިރާމުގެ ޒިޔާރަތެއް ކުރައްވާފަ އެވެ. ޗޮގަމް 2024 ގެ ހަވާސާގައި ބޭއްވި ކޮމަންވެލްތު އިސްވެރިންގެ ރިޓްރީޓްގައި ވެސް އެމަނިކުފާނު ވަނީ ތަފާތު އެކި ދާއިރާތަކާއި ގުޅުންހުރި މައުލޫތަކަށް ވާހަކަފުޅު ދައްކަވައި، ތަފާތު މަޝްވަރާތަކުގައި ބައިވެރިވެވަޑައިގެންފަ އެވެ.
ސަމޯއާގެ ވެރިރަށް އަޕިއާގައި މިދިޔަ ހަފުތާގެ ހޯމަ ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިއަށް ދިޔަ ޗޮގަމް 2024 އަކީ ރާއްޖޭގެ ވެރިކަމާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހަވާލުވެވަޑައިގެންނެވި ފަހުން ބޭއްވި ކޮމަންވެލްތު ގައުމުތަކުގެ އިސްވެރިންގެ ފުރަތަމަ ބައްދަލުވުމެވެ. ބައިނަލްއަގުވާމީ މައިދާނުގައި ހަރަކާތްތެރިވުން އިތުރުކޮށް، ބައިނަލްއަގުވާމީ ފެންވަރުގެ މުހިންމު ބައިވެރިންނާ އެކު ގުޅުން ބަދަހިކުރުމަކީ މި ސަރުކާރުން ހާއްސަ އިސްކަމެއް ދީގެން ކުރަމުން ގެންދާ ކަމެއް ކަމަށް ރައީސް އޮފީހުން ބުނެ އެވެ.
ކޮންމެ ދެ އަހަރަކުން އެއް އަހަރު ބާއްވާ ކޮމަންވެލްތުގެ އިސްވެރިންގެ ބައްދަލުވުމަކީ ދުނިޔޭގެ އިގުތިސޯދާއި ތިމާވެށި އަދި ސަލާމަތީ ގޮންޖެހުންތަކުން އަރައިގަނެ، ވިލުންތެރި މުޖުތަމައެއް ބިނާކުރުމާއި ވިޔަފާރީގެ ދާއިރާ އިތުރަށް ހަރުދަނާކޮށް، ދެމެހެއްޓެނިވި އުސްމިންތަކެއް ހާސިލު ކުރުމަށް ޓަކައި ކޮމަންވެލްތުގެ މެމްބަރު ގައުމުތަކުގެ އިސްވެރިންނާއި ލީޑަރުންނަށް ތަނަވަސް މަންސައެއް ފަހިކޮށްދޭ ބައްދަލުވުމެކެވެ.
