ނިޝާން އަސްކަރީ ވެރިކަމުގެ އިއްޒަތް، ރިޓަޔާޑް މޫސާ އަލީއަށް އަރުވަން ރައީސް ނިންމަވައިފި
ނިޝާން އަސްކަރީގެ ވެރިކަމުގެ އިއްޒަތް، މޭޖާ ޖެނެރަލް (ރިޓަޔަޑް) މޫސާ އަލީ ޖަލީލަށް އެރުވުމަށް، ރައީސް ޑރ. މުހައްމަދު މުއިއްޒު ނިންމަވައިފި އެވެ.
މޫސާ އަލީ ވަނީ ގައުމާއި ރައްޔިތުންގެ ސަލާމަތަށްޓަކައި އަސްކަރީ ގޮތުން ކުރެއްވި އަގުހުރި ހިދުމަތްތަކާއި ގައުމުގެ އިސްތިގްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި މަސައްކަތްތަކެއް ކޮށްދެއްވާފަ އެވެ.
ހާއްސަކޮށް 1988 ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި އުދުވާނީ ހަމަލާއާ ގުޅިގެން ދިވެހި ގައުމާއި ރައްޔިތުންގެ ދިފާއުގައި މޫސާ އަލީ ކުރެއްވި މަސައްކަތް ފާހަގަކުރެވެ އެވެ.
ނިޝާން އަސްކަރީގެ ވެރިކަމުގެ އިއްޒަތް މޫސާ އަލީއަށް އަރުވަން ނިންމާފައިވަނީ އެ ހުރިހާ މަސައްކަތްތަކެއްގެ އަގު ވަޒަންކުރުމުގެ ގޮތުންނެވެ.
އެ އިއްޒަތް ދެއްވުމަށް ރައީސް މުއިއްޒު ނިންމެވީ ދިވެހިރާއްޖޭގެ އިއްޒަތުގެ ގާނޫނުގެ ދަށުން ރައީސްއަށް ލިބިވަޑައިގަންނަވާ އިހްތިޔާރުގެ ދަށުންނެވެ.
ރައީސް އޮފީހުން ބުނީ އެ އިއްޒަތް މޫސާ އަލީއަށް އެރުވުން އޮންނާނީ މި އަހަރުގެ ނަސްރުގެ ދުވަހުގެ މުނާސަބަތުގައި މާދަމާ ރޭ 8:30 ގައި ދަރުބާރުގޭގައި ބާއްވާ ރަސްމީ ޖަލްސާގަ އެވެ.
