ގާނޫނަށް އަމަލުކުރަން ފެށުމާ އެކު ރާއްޖެއަށް ވޭޕް އެތެރެކުރުން މަނާވީ
ދުންފަތް ކޮންޓްރޯލު ކުރުމާ ބެހޭ ގާނޫނަށް ގެނައި އިސްލާހަށް ރޭ އަމަލުކުރަން ފެށުމާ ގުޅިގެން ރާއްޖެއަށް ވޭޕް އެތެރެކުރުން މަނާވެއްޖެ އެވެ.
ދުންފަތް ކޮންޓްރޯލު ކުރުމާ ބެހޭ ގާނޫނަށް ގެނައި އިސްލާހު ރައީސް ޑރ. މުހައްމަދު މުއިއްޒު ތަސްދީގު ކުރައްވާފައި ވަނީ މިދިޔަ ބުދަ ދުވަހުގެ ރެ އެވެ. ގާނޫނުގައިވާ ގޮތުން ރޭ 12 އިން ފެށިގެން އިލެކްޓްރޯނިކް ސިނގިރެޓާއި ވޭޕް ކުރުމަށް ބޭނުންކުރާ އާލަތްތަކާއި އެ އެއްޗެއްސާ އެކު ބޭނުން ކުރުމަށް ތައްޔާރުކޮށްފައިވާ އުފެއްދުންތައް ރާއްޖެއަށް އެތެރެކުރުން މަނާވާނެ އެވެ.
އަދި އަންނަ މަހުގެ 15 ވަނަ ދުވަހުން ފެށިގެން އީ-ސިނގިރެޓާއި ވޭޕް ކުރުމަށް ބޭނުންކުރާ އާލަތްތަކާއި އެ އެއްޗެއްސާ އެކު ބޭނުން ކުރުމަށް ތައްޔާރުކޮށްފައިވާ އުފެއްދުންތައް ރާއްޖެއަށް އިޝްތިހާރު ކުރުމާއި ހިލޭ ބެހުން މަނާވާނެ އެވެ. އޭގެ އިތުރުން 21 އަހަރުން ދަށުގެ މީހުންނާއި ކުޑަކުދިންނަށް ދުންފަތުގެ އެއްވެސް ބާވަތެއް ނުވަތަ ދުންފަތުން އުފައްދާފައި ހުރި އެއްވެސް އެއްޗެއް ވިއްކުން ނުވަތަ ވިއްކުމުގެ މުއާމަލާތެއްގައި 21 އަހަރުން ދަށުގެ މީހަކު ނުވަތަ ކުޑަކުއްޖަކު ބައިވެރިކުރުން މަނާކުރެ އެވެ.
ގާނޫނަށް ގެނައި އިސްލާހާ އެކު އީ-ސިނގިރޭޓާއި ވޭޕް ކުރުމަށް ބޭނުންކުރާ ތަކެތި ރާއްޖެ އެތެރެކުރުން މަނާކުރާއިރު، އެ ތަކެތި އެތެރެކޮށްފި ނަމަ 50,000 ރުފިޔާއިން ޖޫރިމަނާކޮށް, ކޮންމެ އީ-ސިނގިރޭޓަކުން ނުވަތަ ވޭޕްގެ އާލާތަކަށް 10,000 ރުފިޔާގެ މަގުން ޖޫރިމަނާ ކުރާނެ އެވެ.
އެ ތަކެތި ވިއްކުން މަނާވާއިރު، އެކަމާ ހިލާފުވެއްޖެނަމަ 20,000 ރުފިޔާއިން ޖޫރިމަނާކޮށް, ކޮންމެ އާލާތަކަށް 10,000 ރުފިޔާގެ މަގުން ޖޫރިމަނާ ކުރާނެ ކަމަށް ވެސް ގާނޫނުގައި ބުނެފައިވެ އެވެ.
އަދި ހިލޭ ބަހައިފިނަމަ 10,000 ރުފިޔާއިން އަދި ބޭނުންކުރާ މީހުން 5،000 ރުފިޔާއިން ޖޫރިމަނާ ކުރާނެ އެވެ. އޭގެ އިތުރުން އެފަދަ އެއްޗެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ނަމަ އިތުރަށް 50,000 ރުފިޔާއިން ޖޫރިމަނާ ކުރާނެ ކަމަށް ގާނޫނުގައި ވަނީ ބަޔާންކޮށްފަ އެވެ.
ދުންފަތް ކޮންޓްރޯލު ކުރުމާ ބެހޭ ގާނޫނަށް ގެނައި އިސްލާހަށް އަމަލުކުރަން ފެށުމާ އެކު ދައުލަތުގެ އެންމެހާ އިދާރާތައް ހިންގާ އިމާރާތްތަކާއި އެ ތަންތަނުގެ ގޯތިތެރޭގައި ދުންފަތުގެ އިސްތިއުމާލުކުރުން މަނާވާނެ އެވެ.
މިދިޔަ މަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސަރުކާރުން ވޭޕް މަނާކުރަން ނިންމި ނިންމުމާ ގުޅޭގޮތުން ވާހަކަ ދައްކަވަމުން ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހްސާން ވިދާޅުވެފައި ވަނީ ސްކޫލުތަކުގައި ކިޔަވަމުން އަންނަ ދަރިވަރުންގެ ތެރެއިން ގްރޭޑް ތިނެއްގައި އުޅޭ ކުދިންގެ ތެރޭގައި ވޭޕްއަށް ދެވި ހިފާފައިވާ ކުދިން އުޅޭ ކަމަށެވެ. އެއީ ގާތްގަނޑަކަށް އުމުރުން އެންމެ 9 އަހަރުގެ ކުދިން ކަމަށާއި ސަރުކާރުގެ އޮތް ކަންބޮޑުވުމަކީ އެފަދަ ތަކެތީގެ ތެރެއަށް ލާފައި އޮޅުވާލައިގެން އެ ކުދިންނަށް މަސްތުވާތަކެތި ދެމުން އަންނަ އައުން ކަމަށެވެ.
މިއީ މަސްތުވާތަކެތި ބޭނުންކުރާ އާންމު އުސޫލުގެ ތެރެއިން ނުފެންނަ ޓްރެންޑެއް ކަމަށެވެ. އުމުރުން ނުވަ އަހަރުން ފެށިގެން އެގާރަ އަހަރާ ދެމެދުގެ ކުދިން އެފަދަ ތަކެތި ބޭނުންކުރާތަން މިހާތަނަށް ފެނިފައިނުވާ ކަމަށެވެ. ކަމުގައި އޮތް ބިރަކީ މި ނިޒާމުގެ ތެރެއިން މަސްތުވާތަކެތި ބޭނުންކުރަމުން އަންނަ ޖީލެއް ރާއްޖެ އުފެދިދާނެ ކަމުގެ ބިރު ކަމަށް ވެސް އިހްސާން ވިދާޅުވި އެވެ.
ހޯމްލޭންޑް މިނިސްޓަރު ވިދާޅުވި ގޮތުގައި ރާއްޖެ ހިމެނޭ ސަރަހައްދުގައި 11 ގައުމެއް އޮންނައިރު، އޭގެ ތެރެއިން 8 ގައުމަކުން ވޭޕް ބޭނުންކުރުން މަނާކޮށްފައިވާ ކަމުގަ އެވެ. އެ ގައުމުތަކުން މަސްތުވާތަކެތީގެ މައްސަލައަށް ގޮތް ނިންމުމުގައި ވެސް "އެޓޭކް" ކުރީ ވޭޕަށް ކަމުގައި ފާހަގަކުރެއްވި އެވެ.
Ads by STO
