ނޫސްވެރިކަމުގެ ބިލު ފާސްނުކުރަން ޑިމޮކްރެޓްސްއިން ގޮވާލައިފި
ތުޅާދޫ ދާއިރާގެ އަމިއްލަ މެންބަރު އަބްދުﷲ ހަންނާން މަޖިލީހަށް ހުށަހަޅުއްވާފައިވާ މީޑިއާ ކޮމިޝަން ބިލު ރައްޔިތުންގެ މަޖިލީހުން ފާސްނުކުރުމަށް ޑިމޮކްރެޓްސްއިން ގޮވާލައިފި އެވެ.
އެ ބިލުގައި ބުނެފައިވާ ގޮތުން މިހާރު އޮންނަ އުސޫލާ ހިލާފަށް ދެން މީޑިއާ ކޮމިޝަން އެކުލަވާލާނީ ރައީސުލްޖުމްހޫރިއްޔާއަށްވެސް މެމްބަރުން އައްޔަނުކުރެވޭ ގޮތަށެވެ.
އެގޮތުން ކޮމިޝަންގައި ތިއްބަވާ ހަތް މެމްބަރުންގެ ތެރެއިން ހަތަރު މެމްބަރުންނަކީ ރައީސުލްޖުމްހޫރިއްޔާ އައްޔަނުކުރާ މެމްބަރުން ނެވެ.
އޭގެ އިތުރުން އެ ބިލުގައި ނޫސްވެރިންނާއި ނޫސްތަކާއި ބްރޯޑްކާސްޓަރުން ޖޫރިމަނާކުރެވޭނެ ކަމަށް ވެސް ބުނެފައި ވެއެވެ.
އެ ބިލާ ގުޅޭ ގޮތުން ޑިމޮކްރެޓްސްއިން މިއަދު ނެރުނު ބަޔާނުގައި ބުނީ ޑިމޮކްރެޓިކް ނިޒާމެއްގެ ތެރެއިން، އަދި ރާއްޖޭގެ ގާނޫނުއަސާސީން ވެސް ބަލައިގަނެފައިވާ އެންމެހާ ހަމަތަކާއި އުސޫލުތަކަށް ބެލުމެއްނެތި، ނޫސްތަކުގެ މައްޗަށް ކަންކަން މަޖުބޫރުކުރުމާއި، ނޫސްވެރިންނަށް އަދަބު ދިނުމާއި، ނޫސްތައް ބަންދުކުރުމުގެ ބާރު އަތަށް ނެގޭގޮތަށް އެކުލަވާލައި ރައްޔިތުންގެ މަޖިލީހަށް ބިލު ހުށަހަޅާފައިވާތީ އިންތިހާއަށް ކަންބޮޑުވާކަމަށެވެ.
އެގޮތުން ޗާޕްކޮށްގެންނާއި އޮންލައިންކޮށް ނޫސް ހިންގުމަކީ ސަރުކާރުން ލައިސަންސެއް ނުވަތަ ހުއްދައެއް ނުވަތަ ރެޖިސްޓްރޭޝަނެއް ހޯދައިގެން ކުރަންޖެހޭކަމަކަށް މިހާރު ނުވާއިރު ބިލުގައި އެކަން މަޖުބޫރުކުރަން ހުށަހަޅާފައި އޮތް އޮތުމަކީ އެންމެ ބޮޑު ކަންބޮޑުވުމެއްގެ ގޮތުގައި ޑިމޮކްރެޓްސްއިން ވަނީ ފާހަގަކޮށްފަ އެވެ.
"ޑިމޮކްރެޓިކް ނިޒާމެއްގެ ތެރެއިން، ނޫސް ހިންގުން ވާންޖެހެނީ ފުރިހަމައަށް އެއްކޮށް އަމިއްލައަށް ރެގިޔުލޭޓްކުރެވިގެން ހިންގޭ ނޫސްވެރިކަމަކަށެވެ. އެމަގަށް ގެންދިއުމަށް އިތުރަށް ކުރަންޖެހޭ މަސައްކަތް ވަނިކޮށް، އެއާ ހިލާފަށް ޤާނޫނަށް މިހާރު ހުށަހަޅާފައިވަނީ މިހާރު އޮތް ހާލަތަށްވުރެ ވެސް ބޮޑުތަނުން ގޯސްކޮށް ނުވަތަ ބޮޑުތަނުން ނޫސްތައް ދައުލަތުގެ އިދާރާއަކުން ރެގިޔުލޭޓްކުރުމަށެވެ. އަދި އެ އިދާރާ އަތުރާލާފައިވަނީ ވެސް ރައީސުލްޖުމްހޫރިއްޔާއަށް ކޮންޓްރޯލް އޮންނަ ގޮތުގައިކަން ކަންބޮޑުވުމާއެކު ފާހަގަކުރަމެވެ." ޑިމޮކްރެޓްސްއިން ނެރުނު ބަޔާނުގައި ބުނެފައި ވެއެވެ.
ޑިމޮކްރެޓްސްއިން އިތުރަށް ބުނީ ސަރުކާރު ހިތް ނުރުހޭ ގޮތަކަށް މައުލޫމާތު ޝާއިއުކުރެވިދާނޭކަމުގެ ބިރަށް، އެ މައުލޫމާތެއް ޝާއިއުކުރުމުގެ ކުރިއަށް ނަފުސު ސެންސަރުވެގެން އެ މައުލޫމާތެއް ވަކިގޮތަކަށް ބައްޓަންކުރުމަށް މަޖުބޫރުކުރުވާގޮތަށް އެ ބިލު ފަރުމާކޮށްފައިވުމީ ނޫސްވެރިކަމުގެ މިނިވަންކަން ނަގައިލުމުގެ އަމަލެއްކަމަށް ދެކޭ ކަމަށެވެ.
އެހެންކަމުން މިހާރު ހުށަހަޅާފައި އޮތް ބިލު ފާސްނުުކުރުމަށް ޑިމޮކްރެޓްސްއިން ވަނީ ގޮވާލައިފަ އެވެ.
