ސިނާއަތެއް ފުނޑާލުމަކީ ރައްޔިތުންގެ ފަޅިއަށް އެރުމެއް ނޫން: ޝާހިދު
ސިޔާސީ ގޮތުން ވަގުތީ މެޑެއްޔެއް ޖަހާލަން ސިނާއަތެއް ފުނޑާލުމަކީ އަދި ރައްޔިތުންގެ ފަޅިއަށް އެރުން ނޫން ކަމަށް ވިދާާޅުވެ އެމްޑީޕީގެ ރައީސް އަބްދުﷲ ޝާހިދު، ރައީސް ޑރ. މުހައްމަދު މުއިއްޒަށް ރައްދުދެއްވައިފި އެވެ.
ރާއްޖެ އަންނަ ކޮންމެ ޓޫރިސްޓަކަށް ވަކި ރޭޓެއްގެ ދަށުން ޑޮލަރު މާާރުކުރަން މަޖުބޫރުވާ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލާފައިވާ އާ ގަވާއިދާ ގުޅިގެން ޓޫރިޒަމް ދާއިރާގައި ހަރަކާތްތެރިވާ ފަރާތްތަކުން ކަންބޮޑުވުން ފާޅުކުރަމުންދާ މި ދަނޑިވަޅު ރައީސް އިއްޔެ ވިދާޅުވީ ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ރައްޔިތުންނަށް ވަރަށް ސާފުވާތަން ކުރިއަށް އޮތްތަނުގައި އިތުރަށް ފެންނާނެ ކަމަށެވެ.
އެހެންނަމަވެސް މި ސަރުކާރު ކުރިއަށް ދާނީ ރައްޔިތުންގެ ފަޅީގައި އޮވެ ހުރިހާ ރައްޔިތުންނަށް އިންސާފުވެރިކަމާ އެކު ތަނަވަސްކަން ހޯދައިދިނުމުގައި ކަމަށް އެމަނިކުފާނު ވިދާޅުވި އެވެ.
ރައީސްގެ ވާހަކަަތަކަށް ރައްދު ދެއްވައި ޝާހިދު މިރޭ "އެކްސް" ގައި ކުރެއްވި ޕޯސްޓެއްގައި ވިދާޅުވީ ބޭރު ފައިސާ އާ ބެހޭ ގަވާއިދާއި މަނީޗޭންޖިން ވިޔަފާރި އާ ބެހޭ ގަވާއިދަށް ބަދަލުތައް ގެނައުމުގައި ކަމާ ގުޅުންހުރި ފަރާތްތަކާ މަޝްވަރާ ނުކޮށް ސަރުކާރުން ކަންކަން ކުރަން އުޅުމުން އެންމެ ބޮޑު ސިނާއަތަށް ބޮޑެތި ގެއްލުންވާ މަގަށް ކަންކަން ދާތަން މިހާރު ފެންނަން ފަށާފައިވާ ކަމަށެވެ.
އިގުތިސާދުގެ މައިބަދައަކީ ކޮންމެ ގައުމެއްގައި ވެސް ރައްޔިތުންގެ ތެރެއިން އުފެދިގެން އަންނަ ވިޔަފާރިތައް ކަމަށްވާއިރު، ސަރުކާރުތަކުން ވިޔަފާރި އާއި ގުޅުންހުރި ސިޔާސަތުތަކަށް ބޮޑެތި ބަދަލުތަކެއް ގެންނަން ވާނީ ކުދި އަދި މެދުފަންތީގެ ވިޔަފާރިތަކާއި ބޮޑެތި ވިޔަފާރިތަކަށް ގެއްލުން ނުވާނެ ގޮތަށް ކަމުގައި ދެކެވަޑައިގަންނަވާ ކަމަށް އެމްޑީޕީގެ ރައީސް ވިދާޅުވި އެވެ.
"އެ ފަރާތްތަކާއި މަޝްވަރާކޮށް ގޮތް ނިންމުމަކީ އެންމެ ރަނގަޅު ގޮތް. ސިޔާސީ ގޮތުން ވަގުތީ މެޑެއްޔެއް ޖަހާލަން ސިނާއަތެއް ފުނޑާލުމަކީ އަދި ރައްޔިތުންގެ ފަޅިއަށް އެރުނީއެއް ނޫން. މަޝްވަރާ އިސްކުރައްވާ!،" ޝާހިދު ވިދާޅުވި އެވެ.
Ads by STO
