އެއްވެސް ޕްރިންސިޕަލެއްގެ ނުރުހުމުގައި އެހެން ސްކޫލަކަށް ބަދަލެއް ނުކުރާނެ: އެޑިއުކޭޝަން
އެއްވެސް ޕްރިންސިޕަލެއްގެ ނުރުހުމުގައި އެހެން ސްކޫލަކަށް ބަދަލު ނުކުރާނެ ކަމަށް އެޑިއުކޭޝަން މިނިސްޓްރީން ބުނެފިއެވެ.
އެމިނިސްޓްރީން ޕްރިންސިޕަލުންގެ ވަޒީފާއާއިބެހޭ ޤަވާއިދަށް ގެނައި އިސްލާހާއެކު މިހާރު އެއް ސްކޫލެއްގައި ޕްރިންސިޕަލަކަށް އެންމެ ގިނަވެގެން ހުރެވެނީ އަށް އަހަރު ވަންދެންނެވެ. މިއިސްލާހާއި ގުޅިގެން ގިނަ ޕްރިންސިޕަލުންގެ ނުރުހުން ވަނީ ވަރަށް ބޮޑަށް އަމާޒުވެފައެވެ.
ޕްރިންސިޕަލުން ބުނެފައިވާ ގޮތުގައި މިއިސްލާހުގެ ސަބަބުން އެބޭފުޅުންގެ ހައްޤުތައް ގެއްލޭނެއެވެ. ނަމަވެސް އެޑިއުކޭޝަން މިނިސްޓްރީން ބުނީ އިސްލާހުގެ ސަބަބުން އެބޭފުޅުންގެ އެއްވެސް ޙައްޤަކަށް އުނިކަމެއް ނާންނާނެ ކަމަށެވެ.
އެމިނިސްޓްރީން މީގެ ކުރިން ބުނީ އަށް އަހަރުގެ މުއްދަތު ހަމަވުމުން އެހެން ސްކޫލަކަށް ބަދަލުވާން ޖެހޭނެ ކަމަށެވެ. ނަމަވެސް މިއަދު އެޑިއުކޭޝަން މިނިސްޓްރީން ނެރުނު ބަޔާނެއްގައި ބުނެފައިވަނީ އެ އުސޫލުގެ ދަށުން އެއްވެސް ޕްރިންސިޕަލަކު ނުރުހުމުގައި އެއްވެސް ތަނަކަށް ބަދަލު ނުކުރާނެ ކަމަށާއި ޕްރިންސިޕަލަކު މަސައްކަތްކުރަން ޝައުގުވެރިވާ ސްކޫލްތަކެއް ބަލައި އުސޫލުގައި ބުނެފައިވާ ގޮތަށް އެ ސްކޫލަކަށް ހަމަޖެއްސުމުގެ ކަންކަން ކުރިއަށް ގެންދަން ޖެހޭނެ ކަމަށެވެ.
"އުސޫލުގެ ދަށުން ޓެނުއާރ ފަށާނީ މިނިސްޓްރީ އޮފް އެޑިޔުކޭޝަނުން ލިޔުމުން އެކަން ކަނޑައަޅައި ހަވާލުކުރާ ތާރީޚުން ފެށިގެންނެވެ. ފުރަތަމަ 4 އަހަރުގެ ޓެނުއަރ ނިމި، އިތުރު 4 އަހަރަށް އެ ސްކޫލުގައި ހުންނަން ބޭނުންނަމަ، އެކަމަށް އެދި ހުށަހެޅޭނެއެވެ. ނުވަތަ ޝައުގުވެރިވާ އެހެން ސްކޫލަކަށް ބަދަލުވާން ބޭނުންވާނަމަ އެ ފުރުޞަތުވެސް ލިބިގެންދާނެއެވެ." އެޑިއުކޭޝަން މިނިސްޓްރީގެ ބަޔާނުގައިވެ އެވެ.
