ރާއްޖެއަކީ ހަރުކަށި ފިކުރުގެ ރައްޔިތެއް ދިރިއުޅޭ ޤައުމެއްކަން ސިފަކުރަން ކުރާ މަސައްކަތް ހުއްޓާލާ: އިދިކޮޅު
ރައްޔިތުންގެ ވިސްނުން ބައިބައިކޮށް ބޭރު ދުނިޔޭގައި ރާއްޖެއަކީ ހަރުކަށި ފިކުރުގެ ރައްޔިތެއް ދިރިއުޅޭ ޤައުމެއްކަން ސިފަކުރަން ކުރާ މަސައްކަތް މިހާރުން މިހާރަށް ހުއްޓާލުމަށް އިދިކޮޅު ޕްރޮގްރެސިވް ކޯލިޝަނުން ގޮވާލައިފިއެވެ.
ޕީޕީއެމް/ޕީއެންސީ އިން މިރޭ ނެރުނު ބަޔާނެއްގައި ބުނެފައިވަނީ އެކޯލިޝަނާއި ރައްޔިތުން މަސައްކަތް ކުރަނީ އައިއެސްއައިއެސް އިން ރާއްޖެ ހިފުމުގެ ޕްލޭނަކަށް ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެފައިވާ ވިދާޅުވުން އެކޯލިޝަނުން ހަރުކަށި އިބާރާތުން ކުށްވެރިކުރާ ކަމަށެވެ.
އެކޯލިޝަންގައި ހިމެނޭ އެއްވެސް ޕާޓީއަކުން ހަރުކަށި އަދި ހައްދު ފަހަނައަޅާފައިވާ އެއްވެސް ފިކުރަކަށް ތާޢީދެއް ނުކުރާނެ ކަމަށާއި ދިވެހިރާއްޖޭގައި ޓެރަރިޒަމް އާއި ދެކޮޅަށް އެންމެ ހަރުކަށި ފިޔަވަޅު އަޅުއްވާ ހަރުދަނާ މަސައްކަތްތަކެއް ކޮށްފައިވަނީ ވެސް ޕީޕީއެމްގެ ވެރިކަމުގައި ކަމަށް އެކޯލިޝަންގެ ބަޔާނުގައި ބުނެފައިވެއެވެ.
"ހަމައެއާއެކު ރާއްޖެއިން ބޭރުގެ އެއްވެސް ބައެއްގެ ޖާއިޒް ނޫން ނުފޫޒެއް އަޔަނުދީ، ސިޔާދަތީ ބާރު ދިވެހިންނަށް ކަށަވަރު ކޮށްދިނީ ވެސް ޕީޕީއެމްގެ ވެރިކަމުގައެވެ. އަދި ދިވެހިންގެ ކަންކަން ނިންމާނީ ދިވެހިންކަމާއި، ދިވެހި ޤައުމުގެ ކަންކަން ނިންމާނީ ދިވެހިން ބޭނުންވާ ގޮތަށް ކަމާއި، އެއުސޫލުތައް ސާބިތުކަންމަތީ ހިފެހެއްޓެވީ ޕީޕީއެމްގެ ރައީސް ޢަބްދުﷲ ޔާމީން ޢަބްދުލްޤައްޔޫމެވެ." އިދިކޮޅު ކޯލިޝަންގެ ބަޔާނުގައި ވެއެވެ.
Ads by STO
