މޯލްޑިވިއަންގެ ބޮޑު ބޯޓަށް ބޭރު ޕައިލެޓުން ގެންނަނީ މީހުން ތަމްރީނުކުރަން
ގައުމީ އެއާލައިން, މޯލްޑިވިއަނުން ގެންނަ ފުރަތަމަ ވައިޑް- ބޮޑީ މަތިންދާބޯޓު (އެއާބަސް އޭ-330) އަށް ބޭރުގެ ޕައިލެޓުން ގެންނަނީ ދިވެހި ޕައިލެޓުން ތަމްރީނުކުރަން ކަމަށް އެ ކުންފުނިން ބުނެފި އެވެ.
264 މީހުންގެ ޖާގައިގެ މަތިންދާބޯޓު ހޯމަ ދުވަހު ރާއްޖެ ގެންނައިރު ބޯޓު ދައްކާލުމަށް މާލޭގެ އުސްފަސްގަނޑު ސަރަހައްދާއި ހުޅުމާލޭގެ ފޭސް އެކެއް އަދި ފޭސް ދޭއް ހިމެނޭ ސަރަހައްދުގައި އެއާ ޝޯ އެއް ބާއްވަން މޯލްޑިވިއަނުން ނިންމާފައިވެ އެވެ.
ދައުލަތުގެ މީޑިއާ ޕީއެސްއެމްގައި މޯލްޑިވިއަންގެ ފްލައިޓް ޓެކްނިކަލް އޮޕަރޭޝަން ހެޑް މުހައްމަދު ޒައިދު އައްސަދު ވިދާޅުވީ އެއާބަސް-330 ބޯޓުތައް ދުއްވުމުގެ ތަޖުރިބާހުރި ބޭރުގެ ޕައިލެޓުން ގެންނަނީ މޯލްޑިވިއަންގެ ޕައިލެޓުން ބޯޓު ދުއްވުމަށް އަހުލުވެރިވަން، ބޭނުންވާ ޓްރެއިނިން ދިނުމަށްޓަކައި ކަމަށެވެ.
"1 އަހަރު ދުވަސް ވަންދެން އެ ބޭފުޅުން (ބޭރުގެ ޕައިލެޓުން) އަޅުގަނޑުމެންނާއެކު އުޅުއްވާނެ، އެއީ އަޅުގަނޑުމެން ކުރީގައި 320 އިންޑަކްޓް ކުރިއިރުވެސް ކަންތައް ކުރީ އެގޮތަށް، އެބޭފުޅުން އައިސް އަޅުގަނޑުމެންގެ ދިވެހި ޕައިލެޓުން ޓްރެއިންކޮށް ނިމުނީމަ ފީލްޑުގައި އުޅޭނީ ދިވެހިން" ޒައިދު ވިދާޅުވި އެވެ.
".. އިތުރު ތަފާތު އޮޕަރޭޝަންތަކަކަށް ދާއިރު މި ދާއިރާއާ ގުޅުންހުރި ލެގަސީ ކެރިއާ ފީލްޑުތަކަށްވުރެ ގިނަ ދާއިރާތަކަށް މި އޭރިއާގައި ހުޅުވިގެންދާކަމަކީ ޝައްކެއްވެސް އޮތް ކަމެއް ނޫން"
އެ ބޯޓަށް ބޭނުންވާ މުވައްޒަފުން ވަޒީފާ އަށް މިހާރު ވަނީ ނަގާފަ އެވެ. އޭގެ ތެރޭގައި އޭ-330 ގެ ކެޕްޓަން ޓްރެއިނީއަކާއި އެ ރޭޓިންގެ 2 ކެޕްޓަނުންނާއި 2 ފަސްޓް އޮފިސަރުން ހިމެނޭ އެވެ. ކެބިން ކްރޫއިންގެ ގޮތުގައި 14 މުވައްޒަފުން ނެގިއިރު، ޗައިނާ ބަހުން ވާހަކަ ދައްކާ 8 ކެބިން ކްރޫއިން ހިމެނޭ އެވެ. އޭގެ އިތުރުން 2 އިންޖިނިއަރުންވެސް ނެގި އެވެ.
ޒައިދު ވިދާޅުވީ އެ ބޯޓާ އެކު އަލަށް ޕައިލެޓުކަމަށް ނިކުންނަ މީހުންނަށްވެސް ފުރުސަތު ލިބޭނެ ކަމަށެވެ.
"ޕައިލެޓުންނާ އިންޖިނިއަރުންނާ، އެކި އެކި ދާއިރާތަކުން ކިޔަވައިގެން ތިބި ބޭފުުޅުންނަށް ޖާގަ ލިބޭނެ މި ދާއިރާއަށް ވަންނަން"
އެ ބޯޓުގެ ފުރަތަމަ ފޭސްގެ ދަތުރުތައް ކުރަން ހަމަޖެހިފައިވަނީ ޗައިނާގެ 3 ސިޓީއަކަށެވެ.
ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން މީގެކުރިން ވިދާޅުވެފައި ވަނީ އެ ބޯޓުގެ ހިދުމަތް ފެށުމުން ރާއްޖޭގެ ފަތުރުވެރިކަމުގެ ސިނާއަތަށް ރަނގަޅު ކުރިއެރުމެއް ލިބޭނެ ކަމަށެވެ. އަދި އިގުތިސޯދުގައި ހަރަކާތްތެރިވާ ވިޔަފާރިތަކަށް މަންފާކޮށް، އާ ވިޔަފާރިތައް އުފެދިގެންދާނެ ކަމަށެވެ.
ވައިޑް ބޮޑީ އެއާކްރާފްޓުގެ ހިދުމަތް ރާއްޖޭގައި ފެށުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ. ސަރުކާރަށް އެއް އަަހަރު ފުރުން ފާހަގަކުރުމަށް ސޯޝަލް ސެންޓަރުގައި މިދިޔަ ނޮވެމްބަރު މަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވެފައިވާ ގޮތުގައި 2024 ވަނަ އަހަރުގެ ތެރޭގައި މޯލްޑިވިއަނުން ދަތުރުކުރާ މަންޒިލްތައް ފުޅާކުރާނެ ކަމުގަ އެވެ. އެގޮތުން ޗައިނާ އާއި ޔޫރަޕުގެ ބައެއް މަންޒިލްތަކަށް މޯލްޑިވިއަންގެ ވައިޑް ބޮޑީ އެއާކްރާފްޓުން ދަތުރުތައް ފަށާނެކަން ފާހަގަކުރައްވާފައިވެ އެވެ.
