ކުޑަކުއްޖެއް ފަދައިން ސުޝާންތު ކަރުދާސް ރޮކެޓު އުކީ ގޭތެރެ ހަޑިކުރާކަށް ނޫން!
އަނެއްކާވެސް މިއޮތީ ބޮލީވުޑްގެ ފިލްމީތަރި ސުޝާންތު ސިންގް ރާޖްޕޫތުގެ ވާހަކައެކެވެ.
ޖޫން މަހުގެ 14 ވަނަ ދުވަހު އަމިއްލައަށް މަރުވި ސުޝާންތު ގެ އެކި ވާހަކަތައް ދުވަސްކޮޅު ކޮޅުން އަންނަނީ މީޑިއާތަކުގެ ސަމާލުކަން ހޯދަމުންނެވެ. އޭނާގެ މަރުގެ ތަހުގީގަށް ބަލާއިރު، އަދިވެސް އެކަން ވަނީ ވަކި ކޮޅެއްގައި ނުޖެހިއެވެ.
ހަމައެކަނި އެނގޭ ކަމަކީ ސުޝާންތު ހުރީ ނަފްސާނީ ބަލި ޖެހިފައި ކަމަަށް ބުނަމުން ދިޔަ އޭނަގެ ލޯބިވެރިޔާ ރިއާ ޗަކްރަބަތީ، މަސްތުވާތަކެތި ބޭނުން ކުރާ ކަމަށާއި އެތަކެތީގެ ވިޔަފާރި ކުރާކަމަށް ފަޅާއެރުމުން، ސުޝާންތު ވެސް މަސްތުވާތަކެތި ބޭނުން ކުރި ކަމަށް އޭނާ ބުނުމެވެ.
ސުޝާންތާއި ބެހޭގޮތުން އެފަދަ އެއްޗެއް ބުނުންވީ އޭނާގެ ފޭނުންނަށް ކެތްވާވަރުގެ ކަމަކަށް ނޫނެވެ. ސޯޝަލް މީޑިއާ ފުރާލީ ސުޝާންތުގެ "އިނޮސެންޓުކަން" ދައްކުވައިދޭ ވީޑިއޯ ތަކުންނެވެ.
އޭގެތެރެއިން އެއް ވީޑިއޯ އިން ފެންނަނީ ކުޑަކުއްޖެއްހެން ސުޝާންތު އޭނާގެ ގޭގެ ބެލްކަނީގައި ހުރެގެން ކަރުދާހުން ރޮކެޓުތަކެއް ހަދާފައި ގޭތެރެއަށް އުކަމުން ދިޔަ ވީޑިއޯ އެކެވެ. އެވީޑިއޯ އާއި ބެހޭގޮތުން މީހުން ބުނެފައިވަނީ އެއީ ސުޝާންތު ގޭތެރެ ހަަަޑިކުރަން ވެގެން ކުރިކަމެއް ނޫން ކަމަށާއި އެއީ އޭނާ އެސްޓްރޮނައުޓަކަށް ނުވަތަ ޕައިލަޓަކަށް ވާން ދެކެމުންދިޔަ ހުވަފެންތަކެއްގެ ސަބަބުން ކުރި ކަމެއް ކަމަށެވެ.
މީގެ އިތުރުން އެހެން ވީޑިއޯތަކެއް ވެސް ވެއެވެ. އޭނާ އައިސްކްރީމާއި ޗޮކްލެޓު ކާން އިން ވީޑިއޯ އެއް ވެސް ވަނީ ހާމަކޮށްފައެވެ. މީހުން ބުނެފައިވަނީ ކުޑަކުދިންގެ ހިޔާލުތަކެއް ހުރި، ދިރިއުޅުމާމެދު ބޮޑެތި ހުވަފެންތަކެއް ދެކެމުންދިޔަ ސުޝާންތު މަސްތުވާތަކެތި ފަދަ ނުރަނގަޅު ވަބާއެއްގައި ނުޖެހޭނެ ކަމަށެވެ.
ކޮންމެެއަކަސް، ސުޝާންތުގެ ފައިނަލް ޕޯސްޓްމޯޓަމް ރިޕޯޓު އައުން އަދި އޮތީއެވެ. އޭނާ މަސްތުވާތަކެތި ބޭނުން ކުރިތޯ ނުވަތަ ނޫންތޯ އޭގެން އެނގޭނެއެވެ.
