ދޮޅު ކިލޯގެ ޑްރަގާ އެކު ހައްޔަރުކުރި ދެ މީހުންގެ ބަންދުގެ މުއްދަތު އިތުރުކޮށްފި
ދޮޅު ކިލޯގެ ޑްރަގާ އެކު، މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި ހައްޔަރުކުރި ޑްރަގު ނެޓްވޯކުގައި ހިމެނޭ ދެ މީހުންގެ ބަންދުގެ މުއްދަތުު އިތުރުކޮށްފި އެވެ.
ފުލުހުންގެ ކައުންޓާ ނާކޮޓިކްސް އިންޓެލިޖެންސާއި ޑްރަގު އެންފޯސްމަންޓް ގުޅިގެން މާލޭގައި ހިންގި އޮޕަރޭޝަނެއްގައި ތިން މީހުންގެ ގްރޫޕެއް ހައްޔަރުކުރީ މިދިޔަ މަހުގެ 20 ވަނަ ދުވަހު އެވެ.
އެ މީހުން ހައްޔަރުކުރީ މާފަންނު ގެއެއްގެ އެޕާޓްމަންޓެއް ބަލައި ފާސްކުރުމުގެ ތެރޭގަ އެވެ. އެ ތަން ބަލައި ފާސްކުރުމުގެ ތެރެއިން މަސްތުވާތަކެތި ކަމަށް ބެލެވޭ ތަކެތި ފެނުނުއިރު، އެ ތަކެތީގެ ވަގުތީ ބަރުދަން 1.5 ކިލޯއަށް ވުރެ ގިނަ ކަމަށް ފުލުހުން ކުރިން ބުނެފައިވެ އެވެ.
މައްސަލަ އާ ގުޅިގެން ހައްޔަރުކުރީ މ. ސައިރިއަސް، މުހައްމަދު ތިބާގް (39އ) އާއި ވ. ރަކީދޫ، ޖަންބުގެ، ފަރީދާ އަބްދުއްރަހްމާން (35އ) ގެ އިތުރުން ސ. މަރަދޫފޭދޫ، ނަސީމީގެ، މުހައްމަދު ޝާނީޒެވެ.
މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ތިބާގާއި ފަރީދާގެ ބަންދަށް 15 ދުވަސް ވަނީ ޖަހާފަ އެވެ. އެ ދެ މީހުންގެ ބަންދުގެ މުއްދަތު ހަމަވާތީ ކޯޓަށް ހާޒިރުކުރުމުން އިތުރު 15 ދުވަހަށް ބަންދުކުރަން ކޯޓުން އިއްޔެ ވަނީ އަމުރުކޮށްފަ އެވެ.
އެ މައްސަލައިގައި ހައްޔަރުކުރި އަންހެން މީހާ ބުނީ ފެނުނު މަސްތުވާތަކެއްޗާ އޭނާއާ ގުޅުމެއް ނެތް ކަމަށެވެ. އޭނާ އެ ގެއަށް ދިޔައީ އެ ގޭގެ މީހުންނަށް ބައެއް ކަންކަމުގައި އެހީތެރިވެދިނުމަށް ކަމަށް ބުނެފައިވެ އެވެ.
މައްސަލައިގައި ހައްޔަރުކުރި ޝާނީޒުގެ ބަންދަށް ފުރަތަމަ ޖެހީ ފަސް ދުވަހެވެ. އެފަހުން އޭނާގެ ބަންދުގެ މުއްދަތު 15 ދުވަހަށް ވަނީ އިތުރުކޮށްފަ އެވެ.
