ޑރ. ޝަހީމް އަލުން ޕީޕީއެމް އަށް، އެޑްވައިޒަރުކަމާއި ހަވާލު ވެއްޖެ
ކުރީގެ އިސްލާމިކް މިނިސްޓަރ ޑރ. މުޙައްމަދު ޝަހީމް ޢަބްދުލް ސައީދު އަލުން ޕީޕީއެމް އާއި ގުޅި، އެޕާޓީގެ އެޑްވައިޒަރު ކަމަށް އައްޔަނު ކޮށްފިއެވެ.
ޕީޕީއެމް/ޕީއެންސީ ކޯލިޝަނުން އެއޮފީހުގައި މިއަދު ބޭއްވި ޚާއްސަ ރަސްމިއްޔާތުގައި ވާހަކަ ދައްކަވަމުން ޑރ. ޝަހީމް ވިދާޅުވީ ރާއްޖެ ވަޑައިގެން ޤައުމީ ޚިދުމަތް ކުރުމުގެ ފުރުސަތު ލިބިވަޑައިގެންނެވުމުން އުފާވެރިކަމުގެ އިހުސާސް ކުރެވޭ ކަމަށެވެ.
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ބަންދުގައި ހުންނެވުމުން އެކަމާއި ހިތާމަ ކުރައްވާކަން ފާހަގަ ކުރައްވާ ޑރ. ޝަހީމް ވަނީ ރައީސް ޔާމީން މިނިވަން ކުރެއްވުމަށް ވެސް ގޮވާލައްވާފައެވެ.
"ރައީސް ޔާމީން މިނިވަންވުމަކީ ވަރަށް މުހިންމު ކަމެއް. އެމަނިކުފާނުގެ މައްޗަށް ކޮށްފައިވާ ދައުވާއަކީ އެއްވެސް އަސާސެއް ނެތް ދައުވާއެއް، އެކަމާ ގުޅޭގޮތުން ކުރެވޭނެ ކިތަންމެ ބަހުސެއް އެބަހުރި އަދި ލީގަލް ޓީމާ ގުޅިގެން ވިޔަސް ރައީސް ޔާމީން މިނިވަން ކުރެއްވުމަށް މަސައްކަތް ކުރާނަން" ޑރ. ޝަހީމް ވިދާޅުވިއެވެ.
ޑރ. ޝަހީމް ވިދާޅުވީ ރާއްޖޭގައި އިސްލާމް ދީން ދެމެހެއްޓުމުގެ މަތިވެރި ޒިންމާ އެޅިފައި ވަނީ ޕީޕީއެމް ޕީއެމްސީ ކޯލިޝަނުގެ މެންބަރުންގެ އިސްތަށިފުޅުގައި ކަމަށެވެ. އަދި އެކަމުގައި އެމަނިކުފާނު ދެމި ހުންނަވާނެ ކަމަށް ޝަހީމް ވިދާޅުވިއެވެ.
