"އެހެނަސް" ގެ ނިމުން ވަރަށް ވެސް ކުލަގަދަކޮށް!
މަޝްހޫރު ވާހަކަ ލިޔުންތެރިޔާ އަހުމަދު އިޤްބާލު (އައިކިޔު) ލިޔެ ޕްރޮޑިއުސްކުރި ކާމިޔާބު ވެބް ސީރީޒް "އެހެނަސް" ރޭގައި މިވަނީ އެއްކޮށް ނިންމާލާފައެވެ.
ނުހަނު އަސަރުގަދަ، ޖަޒުބާތުން ފުރިގެންވާ ކްލައިމެކްސް އަކާއެކު "އެހެނަސް" ނިންމާލާފައި ވަނީ ސީރީޒްގެ ފިނާލޭ ބެލި އެންމެންގެ ލޯތައް ކަރުނައިން ތެންމާލާފައޭ ބުނުން ދޮގަކަށް ނުވާނެއެވެ. އެއަސަރުގައި އެންމެ ބޮޑަށް ރޮވުނު އެއްބަޔަކަށް މިޕްރޮޖެކްޓުގައި މަސައްކަތް ކުރި މީހުން ވެސް ހިމެނެއެވެ.
"އެހެނަސް" ގެ ނިމުން ފާހަގަ ކުރުމުގެ ގޮތުން އިއްޔެ ހަވީރު ބައިސްކޯފުގައި ވަނީ ވަރަށް ޚާއްސަ ހަފްލާއެއް ވެސް ބާއްވާފައެވެ. މިސީރީޒްގައި ހަރަކާތްތެރިވި ހުރިހާ ތަރިންނާއި ކްރޫ މެންބަރުންގެ އިތުރުން ބައިސްކޯފުގެ ޓީމުވެސް ވަނީ މިހަފްލާގައި ބައިވެރިވެފައެވެ.
ހަފްލާގައި ވާހަކަ ދައްކަމުން "އެހެނަސް" ވެބްސީރީޒްގެ ކުޅަދާނަ ޑައިރެކްޓަރ ރަވީ ފާރޫޤް ބުނީ ޑައިރެކްޝަންގައި މާދިގު ކެރިއަރ އެއްގައި ނޫޅުނު ކަމުގައި ވިޔަސް މިޕްރޮޖެކްޓު ޑައިރެކްޓު ކުރުންވީ ވަރަށް "ޗާލު" ތަޖުރިބާ އަކަށް ކަމަށެވެ.
"ޑައިރެކްޝަންގައި މާދިގު ކެރިއަރަކު ނޫން މިއުޅުނީ، އެކަމަކު މިހާތަނަށް ކުރެވުނު މަސައްކަތްތަކާއި އަޅާބަލާއިރު، މިއީ ހަމަ ވަރަށް ޗާލު އެކްސްޕީރިއަންސެއް. އާކުދިންތަކެއް ގޮވައިގެން އެމީހުންނަށް ގައިޑެންސް ދިނުމާއި މިކަންކަމުގައި ވަރަށް ގާތްކޮށް އުޅެވުނު މިޕްރޮޖެކްޓުގެ ތެރޭގައި." ރަވީ ބުންޏެވެ.
"އެހެނަސް" ގެ ވަދާޢީ ޝޯ ބައިސްކޯފުން ރޭގައި ޕްރިމިއަރ ކޮށްފައިވާއިރު، ސީރީޒްގެ މުޅި ޓީމަށް އިއްޔެ ވަނީ އެޝޯ ދައްކާލާފައެވެ. އަދި ވަދާއީ އެޝޯ ވެގެން ދިޔައީ މިޕްރޮޖެކްޓުގައި މަސައްކަތް ކުރި ގިނަ ފަރާތްތަކަށް ވެސް ނުހަނު އަސަރު ކުރި ޝޯއަކަށެވެ.
ޖުމްލަ ދެ ސީޒަނަކަށް ބަހާލައިގެން ގެނެސްދިން މިވެބްސީރީޒްގައި ހަރަކާތްތެރި ވެފައިވަނީ ފާތިމަތު ޝަރާ، މުޙައްމަދު ވިޝާލު، އައިޝަތު ރިޝްމީ، ރަވީ ފާރޫޤް، އައިމިނަތު ޝަމާނާ، އައިމިނަތު ސިލްނާ، އަހުމަދު ޝާރިފް، ޝީލާ ނަޖީބު، މުޙައްމަދު މަނިކު، އަލީ ނަދީހު، މުޙައްމަދު ޔުނާން، ފާތިމަތު ރިހުލާ، މަރިޔަމް އަބްދުލް ހަލީމް، އަޒްމާން ޢަބްދުﷲ، އައިމިނަތު ޝުހާ، ނަތާޝާ ޖަލީލު، ވާޝިޔާ މުޙައްމަދު، މުޙައްމަދު އުޝާމް، ޔާމިން އަލީ، އަހުމަދު ޝަރަފް، ނަބީލް، އަދި އަލީ ޝަޒްލީމް އެވެ.
މިސީރީޒްގެ ސިނަމެޓޮގްރަފީ ހަދައިދީފައިވަނީ "ލައިޓްސްއައުޓް" އިންނެވެ. އަދި ސީރީޒްގައި ފެންނަ ކުރެހުންތަކަކީ "ޕިންކް" ގެ ހިތްގައިމު ކުރެހުން ތަކެކެވެ.
"އެހެނަސް" ގެ ރިވިއުއެއް "ދެން" ގެ ފަރާތުން ވަރަށް އަވަހަށް ގެނެސްދޭނެއިރު، މިހާތަނަށް ބުނެވޭނީ މިއީ ވަރަށް ވެސް ކާމިޔާބު އަދި ގިނަ ބައެއްގެ ތަރުހީބު އިންތިހާއަށް ލިބުނު ސީރީޒެއް ކަމަށެވެ.
ސާބަހޭ ކުދިން
މިއީ ހުރިހާ ގޮތަކުން ވެސް ވަރަށް މޮޅު ސީރީސް އެއް. އެންމެންގެ އެކްޓިންގް ، ޑައިރެކްޝަން ވެސް އެހާ ފައްކާ. ރަވީގެ މި ކަހަލަ މޮޅު އެއްޗަކަށް އިންތިޒާރު ހަމަ މި ކުރަނީ